काठमाडौँ । आगामी जेठ ३ देखि १० गतेसम्म हुने भनिएको १०औं राष्ट्रिय खेलकुद स्थगित भएको छ ।
राष्ट्रिय खेलकुद परिषद्को आज बसेको १२२औं बोर्ड बैठकले १०औं राष्ट्रिय खेलकुद स्थगित गर्ने निर्णय गरेको हो । योसँगै १०औं राष्ट्रिय खेलकुद तेस्रोपटक स्थगित हुन पुगेको छ ।
युवा तथा खेलकुदमन्त्री तेजुलाल चौधरीले जेठमा राष्ट्रिय खेलकुद हुन नसक्ने बताए । एक बोर्ड सदस्यका अनुसार राखेप बैठकमा बोल्दै मन्त्री चौधरीले निर्धारित मितिमा दसौं राष्ट्रिय खेलकुद नहुने निर्णय सुनाएका हुन् ।
यसअघि २०७९ मा गण्डकी प्रदेशमा भएको नवौं राष्ट्रिय खेलकुदबाट २०८१ असोजमा कर्णाली प्रदेशमा १०औं राष्ट्रिय खेलकुद गर्ने निर्णय भएको थियो ।
तर, तयारी नपुगेको भन्दै चैत २३ देखि ३० गतेसम्मका लागि मिति सारियो । उक्त समयमा प्रतियोगिता हुन नसकेपछि पुनः जेठ ३ गतेदेखि १० गतेसम्म गर्ने निर्णय गरियो ।
तर, बोर्ड बैठकले उक्त मितिमा पनि राष्ट्रिय खेलकुद गर्न नसकिने भन्दै प्रतियोगिता स्थगित गरेको हो ।
