काठमाडौँ । इन्डियन प्रिमियर लिग (आईपीएल) २०२५ मा आज चेन्नई सुपर किंग्स (सीएसके)ले कोलकाता नाइट राइडर्स (केकेआर)को सामना गर्दैछ ।

सिजनको २५ औं खेल अन्तर्गत चेन्नईको एमए चिदम्बरम स्टेडियममा साँझ पौने आठ बजे दुई टोलिबीच प्रतिस्पर्धा हुनेछ ।

महेन्द्र सिंह धोनी फेरि एक पटक चेन्नई सुपर किंग्सको कप्तानी गर्दै देखिनेछन् । टोलीका कप्तान रुतुराज गायकवाड चोटका कारण आइपीएलको १८ औं सिजनबाट बाहिरिएका छन् ।

जारी प्रतियोगितामा चेन्नईले निराशाजनक प्रदर्शन गरेको छ । आफ्नो पाँच खेलमा एकमात्र जित हात पारेको उसले चार खेलमा हार बेहोरेको छ । अर्कोतर्फ, केकेआर भने अंक तालिकामा चेन्नई भन्दा अलि राम्रो स्थानमा छ । साविक विजेता केकेआर पाँच खेलमा दुई जित र तीन हारसहित तालिकामा छैटौं स्थानमा छ ।

आईपीएलमा हालसम्म दुई टोलीबीच ३१ खेल खेलिएका छन् । जसमध्ये चेन्नईले २० खेल जितेको छ भने कोलकाताले ११ खेल जितेको छ । चेन्नईमा दुई टोलीबीच ११ खेल खेलिएका छन् । सिएसकेले ८ र केकेआरले ३ खेल जितेको छ ।

सीएसकेका रचिन रविन्द्र टोलीका सर्वाधिक स्कोरर हुन् । उनले ५ खेलमा कुल १४५ रन बनाएका छन् । उनले सिजनको पहिलो खेलमा मुम्बई इन्डियन्स विरुद्ध ६५ रनको अविजित अर्धशतकीय इनिङ खेलेका थिए ।

उनीपछि दोस्रो स्थानमा ऋतुराज गायकवाड छन्, जसले टोलीका लागि ५ खेलमा कुल १२२ रन बनाएका छन् । बलर नूर अहमद ११ विकेटसहित सिजनका सर्वाधिक विकेट लिने खेलाडीको शीर्षस्थानमा छन् ।

केकेआरका लागि अजिंक्य रहाणे सर्वाधिक स्कोरर हुन् । उनले ५ खेलमा १८४ रन बनाएका छन् । रहाणेले पहिलो खेलमा आरसीबीविरुद्ध ५६ रन र लखनऊ विरुद्ध ६१ रनको अर्धशतक बनाएका थिए । बलिङमा, वरुण चक्रवर्तीले ५ खेलमा ६ विकेट लिएका छन् । जारी सिजनमा उनी केकेआरका सर्वाधिक विकेट लिने बलर हुन् ।

कस्तो छ पिच ?
चेन्नईको एमए चिदम्बरम स्टेडियमको पिच स्पिनरहरूका लागि सहयोगी साबित भएको छ । यहाँ ब्याटिङ गर्न अलि गाह्रो छ । यहाँ अहिलेसम्म जम्मा ८८ आईपीएल खेल खेलिएका छन् । ५१ खेल पहिले ब्याटिङ गर्ने टोलीले जितेको छ भने ३७ खेल पछ्याउने टोलीले जितेको छ ।

आज चेन्नईको मौसम धेरै गर्मी हुनेछ । दिनभरि चम्किलो घाम लाग्नेछ, कहिलेकाहीं बादल लाग्नेछ । वर्षाको सम्भावना २५ प्रतिशत छ । तापक्रम २९ देखि ३८ डिग्री सेल्सियसको बीचमा रहने अनुमान गरिएको छ ।

सम्भावित सुरुवाती–११ः
चेन्नई सुपर किंग्सः एमएस धोनी (विकेटकीपर र कप्तान), डेभोन कोनवे, रचिन रविन्द्र, विजय शंकर, रवीन्द्र जडेजा, रविचन्द्रन अश्विन, मुकेश चौधरी, नूर अहमद, मथिश पाथिराना, खलील अहमद, शिवम दुबे ।

कोलकाता नाइट राइडर्सः अजिंक्य रहाणे (कप्तान), सुनील नारायण, क्विन्टन डी कक (विकेटकिपर), भेंकटेश अय्यर, रिंकु सिंह, रमनदीप सिंह, आन्द्रे रसेल, हर्षित राना, वरुण चक्रवर्ती, मोइन अली, वैभव अरोरा ।