काठमाडौँ । समाजवादी मोर्चाले काठमाडौंमा गर्ने प्रदर्शनमा नेकपा (एकीकृत समाजवादी) का सम्मानित नेता झलनाथ खनाल सहभागी नहुने भएका छन् ।
बेथिति एवम् भ्रष्टाचारविरूद्ध गणतन्त्रका पक्षमा समाजवादी मोर्चाले काठमाडौंको भृकुटीमण्डप क्षेत्रमा सभा आयोजना गर्दैछ ।
त्यसअघि मोर्चाघटक दलहरूले विभिन्न ठाउँबाट जुलुस निकालिएको छ । जुलुसको अगुवाइ गर्न चार वटा पार्टीलाई विभिन्न ठाउँ निर्धारण गरिएको छ ।
एकीकृत समाजवादीको जुलुस मैतीदेवी र शान्तिवाटिकाबाट निस्कनेछ । उक्त जुलुस र सभामा पूर्व प्रधानमन्त्रीसमेत रहेका खनाल भने उपस्थित नहुने भएका छन् ।
आफूलाई मञ्चमा वक्ताको रूपमा नराखिएकाले उनी उपस्थित नहुने बुझिएको छ । यद्यपि, कार्यक्रममा भने आफ्नो समर्थन रहेको र घरमै बसेर हेर्ने मनस्थितिमा रहेको नेता खनालको भनाई छ ।
सभामा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा एसका अध्यक्ष माधवकुमार नेपाल, नेपाल समाजवादी पार्टी (नेसपा)का अध्यक्ष महिन्द्रराय यादव र नेकपाका महासचिव नेत्रविक्रम चन्दले बोल्ने कार्यसूची रहेको छ ।
