काठमाडाैंः नेपाल कम्युनिष्ट पार्टी (नेकपा) भित्र समस्या र समाधानका बारेमा सुझाब दिन गठित कार्यदलले आफ्नो प्रतिवेदन अध्यक्षद्वयलाई शनिबार बुझाएको छ । महासचिव विष्णु पौडेलको संयोजकत्वमा गठित कार्यदलले एक साताको गृहकार्यपछि सहमति सहित विवाद समाधानको रूपरेखा समेटेर प्रतिवेदन अध्यक्षद्वयलाई बुझाएको हाे ।
प्रतिवेदनमा ‘पार्टी एकीकरणलाई मजबुत बनाउने र पार्टी भित्रका आन्तरिक विबादलाई सहमतिकै आधारमा निश्कर्षमा पुर्याउने कुरालाई बुँदागत रुपमा उल्लेख गरिएको छ । प्रतिवेदनमा अध्यक्ष तथा प्रधानमन्त्री ओलीले ५ वर्ष नै सरकारको नेतृत्व गर्ने, पार्टी कार्यकारी अध्यक्षका रुपमा पुष्पकमल दाहालले सञ्चालन गर्ने लगायतका कुरा उल्लेख गरिएको कार्यदलका एक सदस्यले जानकारी दिए ।
यस्तो छ कार्यदलको सुझाव : –
१. प्रधानमन्त्री केपी ओलीको राजीनामाको मागलाई थाती राख्ने तथा स्थायी समितिको एजेन्डामा आधारित भएर छलफल अघि बढाउने ।
२. सरकारको नेतृत्व ओलीले र पार्टी सञ्चालन प्रचण्डले गर्ने ।
३. सैद्धान्तिक तथा विवादित अन्य विषय महाधिवेशनबाट टुंगो लगाउने ।
४. आगामी चैतमा महाधिवेशन गर्ने गरी कार्यतालिका तय गर्ने ।
५. सरकारको उपस्थिति र भूमिकालाई प्रभावकारी बनाउन संघीय मन्त्रिपरिषद् र प्रदेश सरकारमा केही हेरफेर गर्ने ।
६. कोरोना संक्रमणको अवस्था सहज भएपछि केन्द्रीय समितिको बैठक बोलाउने ।
गएको साउन ३० गते अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहालले महासचिव बिष्णु पौडेलको संयोजकत्वमा नेताहरू भीम रावल, सुरेन्द्र पाण्डे, शंकर पोखरेल, पम्फा भुसाल र जनार्दन शर्मा सदस्य रहेको कार्यदल गठन गरेका थिए । कार्यदललाई साउन ३२ गते बसेको नेकपा सचिवालय बैठकले अनुमोदन गरेको थियो ।