एजेन्सी । विश्वलाई तेस्रो विश्वयुद्धबाट बचाउने दाबी गर्ने डोनाल्ड ट्रम्पले ट्यारिफ वार घोषणा गरेका छन् ।
सारा विश्व अमेरिकाको व्यापार युद्धको चपेटामा छ । ट्रम्पले क्यानडा र मेक्सिकोमा २५ प्रतिशत आयात शुल्क लगाए पनि चिनियाँ सामानमा २० प्रतिशत भन्सार छ ।
ट्रम्पको यो निर्णयको ती देशले उचित जवाफ दिएका छन् । क्यानडाले अमेरिकी सामानमा २५ प्रतिशत कर लगाउने घोषणा गरेको छ भने चीनले पनि अमेरिकी सामानमा १० र १५ प्रतिशत कर लगाउने घोषणा गरेको छ ।
चीनले भने अमेरिकाले युद्ध चाहेमा अन्तिमसम्म युद्ध लड्न तयार रहेको बताएको छ ।
चीनले भन्यो, ‘फेन्टानिलका लागि अमेरिकामा कोही जिम्मेवार होइन, अमेरिका नै हो । अमेरिकी जनताप्रतिको मानवीय भावना र सद्भावनामा हामीले यो समस्या समाधान गर्न अमेरिकालाई सहयोग गर्न ठोस कदम चालेका छौँ तर हाम्रो प्रयासलाई स्वीकार गर्नुको सट्टा अमेरिकाले चीनलाई बदनाम गर्ने र दोष लगाउने प्रयास गरेको छ ।’
अहिले अमेरिकाले भन्सार बढाएर आफूमाथि दबाब र ब्ल्याकमेल गर्ने प्रयास गरिरहेको चीनले जनाएको छ । अमेरिकाले सहयोगको बदलामा आफूलाई सजाय दिएको चीनले जनाएको छ । सी जिनपिङको सरकारले भन्यो, ‘हामीलाई दबाब र धम्कीले काम गर्दैन ।’
