तनहुँ । तनहुँको भिमाद नगरपालिका–२ धरमपानीबाट महेश सुवेदी बेपत्ता भएपछि खोजीका लागि उनका परिवार तथा आफन्तले आग्रह गरेका छन् ।
घरमा सुतिरहेका ३६ वर्षीय सुवेदी फागुन १७ गते बिहान एकाएक बेपत्ता भएका हुन् । उनको खोजीका लागि परिवार तथा आफन्तले जिल्ला प्रहरी कार्यालय तनहुँमा निवेदनसमेत दिएका छन् ।
राति ठूलोबुवाको घरमा सुतेका महेश बिहान कोठामा फेला नपरेपछि परिवारले खोजी थालेका थिए ।
बिहान सवा ५ बजे सम्पर्कमा आएका महेश त्यतिबेला आफू ‘कहाँ छु भन्ने थाहा नभएको’ बताए लगत्तै मोबाइल अफ भएको महेशका दाजु तथा वडा नम्बर २ का सचिव गोपालकृष्ण सुवेदी बताउँछन् ।
‘राति सँगै सुतेका भाइ बिहान कोठामा हेर्दा थिएनन् र लगत्तै फोन गर्दा सवा ५ बजे भएको थियो । उनले म कहिले गगनगौंडा त कहिले हेमजामाथि जंगलमा भएको र पछि आफू कहाँ छु भन्ने थाहा नपाएको बताएका थिए,’ दाजु गोपालकृष्णले भने ।
महेश हाल कावासोती नगरपालिका–३ मध्यविन्दु टोल बस्दै आएका थिए । उनी भतिजहरुको व्रतबन्धमा भिमादको धरमपानी पुगेका थिए । सोही बेला सुवेदी बेपत्ता भएका थिए । पाँच दिन भइसक्दा पनि परिवार तथा आफन्तको सम्पर्कमा नआएपछि उनको खोजीका लागि आग्रह गरिएको छ ।
जिल्ला प्रहरी कार्यालय तनहुँले छिमेकी जिल्ला र अन्य प्रहरी कार्यालयमा पनि सुवेदीको विवरण पठाएर सर्कुलर गरेको छ ।
उनको कल डिटेल मगाएर लोकेसन विश्लेषण गर्ने काम भइरहेको र अहिले नै उनको एकिन गर्न नसकिएको जिल्ला प्रहरी कार्यालय तनहुँले जनाएको छ ।
