काठमाडौँ । भारतको उडिसा राज्यको कलिंगा इन्स्टिच्यूट अफ् इन्डस्ट्रियल टेक्नोलोजी (केआईआईटी) मा भएको तनावपछि सय जनाभन्दा बढी विद्यार्थी नेपाल फर्किएका छन् ।
पूर्वीनाका काँकडभिट्टा हुँदै १६ र रक्सौल नाकाबाट ९६ जना नेपाली विद्यार्थी स्वदेश फर्किएको स्थानीय प्रशासनले जनाएको छ ।
नेपाली विद्यार्थी प्रकृति लम्सालको रहस्यमय मृत्युपछि विश्वविद्यालयको अवस्था तनावग्रस्त बनेको थियो । घटनापछि केआईआईटीमा अध्ययनरत नेपाली विद्यार्थी विरोधमा उत्रिँदा कलेज व्यवस्थापनले उनीहरूलाई कुटपिट गर्दै बलजफ्ती छात्रावासबाट निकालिएको थियो ।
सोमबार र मंगलबारको घटनापछि केआईआईटीमा अध्ययनरत १ हजार २ सय नेपाली विद्यार्थीमध्ये ६० जना मात्र कलेजमा बाँकी रहेका थिए । तीमध्ये प्रशासनले थप ११२ जनालाई होस्टलमा फर्काईसकेको छ ।
विद्यार्थीहरू स्वदेश फर्किन थालेपछि विश्वविद्यालय प्रशासनले इमेल लेखेर आउनेजाने खर्च बेहोर्ने भन्दै फर्किन आग्रह गरेको विद्यार्थीहरूले बताएका छन् ।
