काठमाडौँ । कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी)ले नेपाली विद्यार्थीहरूसँग भएको दुर्व्यवहारको घटनामा माफी मागेको छ ।
भारतको ओडिसा राज्यको भुवनेश्वरस्थित केआईआईटी क्याम्पसका उपकुलपति प्रा. सरनजीत सिंहले एक विज्ञप्ती जारी गर्दै १६ फेब्रुअरी २०२५ को साँझ क्याम्पसमा भएको अप्रिय घटनाबाट आफूहरू स्तब्ध रहेको जनाएका छन् ।
उनले भनेका छन्, ‘हामीमध्ये केहीले आन्दोलनकारी विद्यार्थीहरूसँग गरेको व्यवहारप्रति पनि हामी दुःखी छौं । हामी हाम्रा विद्यार्थीहरूलाई माया गर्छौँ र उनीहरूलाई कहिल्यै कुनै हानि पुर्याएका छैनौँ ।’
दुई अधिकारीहरूले विद्यार्थीहरूको बारेमा गरेको टिप्पणीहरू अत्यन्तै गैरजिम्मेवारपूर्ण रहेको भन्दै ती टिप्पणीहरू उनीहरूको व्यक्तिगत क्षमतामा क्षणिक रूपमा गरिएको पनि विज्ञप्तीमा जनाइएको छ । त्यसलाई क्याम्पसले समर्थन नगर्ने विज्ञप्तिमा उल्लेख छ ।
उनीहरूलाई क्याम्पसबाट निलम्बन गरेको जानकारी दिँदै उनीहरूले पनि आफ्नो व्यवहारको लागि माफी मागिसकेको सिंहले बताएका छन् ।
पत्रमा भनिएको छ, ‘हामी पनि सबै कुराको लागि माफी चाहन्छौं र सबै नेपाली विद्यार्थी र नेपालका जनतालाई हाम्रो माया र स्नेह व्यक्त गर्दछौँ ।’
यस्तै, नेपाली विद्यार्थीलाई भारतीय जस्तै स्नेह गरेको उल्लेख गर्दै उनीहरूलाई यथासिघ्र नियमित अध्ययनमा सामेल हुन पत्रमार्फत अपिल गरिएको छ ।
