काठमाडौँ। लोकप्रीय संचारकर्मी दिपक समिरद्वारा लेखिएको कथा संग्रह ‘मुना–मदनको डिभोर्स पार्टी’ सार्वजनिक भएको छ । सामाजिक बिषयबस्तुमा आधारित कथा संग्रह आज राजधानीमा आयोजित एक कार्यक्रमका बीच सार्वजिक भएको हो ।
सो अवसरमा कथा संग्रहको समिक्षा गर्दै प्राध्यापक तथा समालोचक डाक्टर गीता त्रिपाठीले दिपक समिरका कथा ‘इतिहाँस’ र ‘बर्तमान’लाई जोड्ने पूल बनेको बताइन् । कथा संग्रहमा रहेको ‘नवराज बिकको भ्यालेन्टाइन डे’ शिर्षकको कथाले रुकुम हत्या काण्डमा मारिएका नवराज बिकलाई समेटेको भन्दै उनले कथा संग्रह नेपालको सामाजिक परिवेश र समाजको पीँधमा पारिएको वर्गप्रति लक्षित रहेको बताइन् । उनले भनिन्, ‘रुकुममा नवराज बिकको जातीयतामा आधारित पीडाको रगत बगेको छ । समाजको निकै वर्वर अवस्थामा नवराज मारिए तर त्यो पीडालाई कथामा उतारेर लेखकले नवराजलाई न्याय गरेका छन् ।’
समिरका अधिकांश कथा श्वेर कल्पनामा आधारित भएता पनि कथामा मौलिकता सहितको नारीबादी चेतना प्रखर रुपमा प्रयोग गरिएको उनले बताईन् । समाजको पीँधमा पारिरएका समदायलाई कुनै न कुनै बिम्ब प्रयोग गरेर कथाको मुख्य पात्र बनाई तिनका बारेमा कल्पनामा बगेर कथा लेख्नु कथाकार समिरको आफ्नै मौलिकता रहेको समालोचक त्रिपाठीको भनाई छ ।
कथा संग्रहका बारेमा चर्चा गर्दै सार्वजनिक सेवा प्रसारण (रेडियो नेपाल/नेपाल टेलिभिजन)का कार्यकारी अध्यक्ष डाक्टर महेन्द्र बिष्टले समाजको बिम्ब कथामा उतारिएको बताए । दिपक समिरका कथाले भौगोलिक छलाङ्ग मारेको भन्दै उनले कथा संग्रहमा कबिता, निबन्ध र गीतको समेत संयोजन गरिएकाले कथा निकै उत्कृष्ट रहेको बताए । दिपक समिर बहु–आयामिक ब्यक्तित्वका धनि भएको भन्दै अध्यक्ष बिष्टले समिरका कथाले समाजलाई सचेत बनाउन मदत गर्ने धारणा ब्यक्त गरे ।
कार्यक्रममा बोल्दै सार्वजनिक सेवा प्रसारण (रेडियो नेपाल/नेपाल टेलिभिजन)का कार्यसमिति सदस्य फूलमान बल तामाङ्गले दिपक समिरका कथामा भूत, वर्तमान र भविष्यको संयोजन गरिएको बताए । अति यथार्थवादी कल्पनाशिलताको प्रयोग गरिएका कारण कथामा नयाँ आयाम थपिएको भन्दै उनले आजको बिसंगत समाजलाई पर्दाफास गर्न कथा संग्रह सफल भएको दाबी गरे । उनले भने– ‘मुना मदनको डिभोर्स पार्टी शिर्षकको कथाले समाजको बिसंगत पक्षलाई उजागर गरेको छ । यस कथाले समाजमा पैदा भएको उच्छृङ्खलतामाथि प्रश्न गरेको छ, जुन आजको प्रश्न पनि हो ।’
कार्यक्रममा नेपाल टेलिभिजन राष्ट्रिय प्रशारणका प्रमुख टंक उप्रेतीले समाजमा नदेखिएका बिषयलाई सुक्ष्म तरिकाले अध्ययन गरि कथा लेखेको भन्दै कथाकार समिरको सिर्जनशिलता, नविनता र प्रभावकारिताको प्रशंसा गरे ।
आफ्नो जन्म दिनको अवसरमा कथा संग्रह सार्वजनिक गरेको भन्दै संचारकर्मी तथा कथाकार समिरले आफ्नो संचारथलो रेडियो र टेलभिजन नै कथा संग्रहको पृष्ठभुमि भएको बताए । बिगतमा आफुले गरेको संघर्ष र मेहनतले आफुलाई कथाकारको उचाइँमा समेत पुर्याएको भन्दै आफ्ना दिवंगत आमा बुवालाई सम्झेर उनी भावुक बनेका थिए ।
कार्यक्रममा बिभिन्न बिधाका साहित्यकार, समालोचक, संचारकर्मी तथा प्रतिष्ठित ब्यक्तित्वहरुको बाक्लो उपस्थिति थियो । इन्डिगो इन्कद्वारा प्रकाशित कथा संग्रहमा कथा संग्रहमा बिभिन्न शिर्षकका १४ वटा कथाहरु समावेश गरिएको छ ।
