एजेन्सी । भारतीय जनता पार्टी (भाजपा)ले २७ वर्षपछि दिल्लीमा पुनरागमन गर्दैछ । भारतको निर्वाचन आयोगका अनुसार भाजपाले ५ सिट जितेको छ भने ४३ सिट अर्थात् कुल ४८ सिटमा अग्रता लिएको छ ।
आम आदमी पार्टी (आप)ले ६ सिट जितेको छ भने १६ सिट अर्थात कुल २२ सिटमा अगाडि छ । कांग्रेसले एक सिट पनि पाएको छैन ।
आम आदमी पार्टीका अरविन्द केजरीवाल नयाँ दिल्लीबाट चुनाव हारेका छन् भने मनिष सिसोदिया पनि जंगपुरा सिटबाट चुनाव हारेका छन् । तर, मुख्यमन्त्री आतिशी कालकाजीले चुनाव जितेकी छन् । अर्का नेता सत्येन्द्र जैनले पनि चुनाव हारेका छन् ।
हारपछि केजरीवालले भने–‘हामी हार स्वीकार गर्छौं । म बीजेपीलाई जितको लागि बधाई दिन्छु । जनताले उसलाई बहुमत दिएका छन् । उनीहरुले जनताको अपेक्षा पूरा गर्नेछन् भन्ने आशा लिएको छु ।’
दिल्लीस्थित भाजपा मुख्यालयमा उत्सव जारी छ । प्रधानमन्त्री नरेन्द्र मोदी साँझ ७ बजे पार्टी मुख्यालय पुगेर कार्यकर्तालाई सम्बोधन गर्नेछन् । यसैबीच केजरीवाललाई पराजित गर्ने बीजेपी उम्मेदवार प्रवेश वर्माले अमित शाहलाई भेट गरेका छन् ।
सन् २०२० मा भाजपाले जम्मा ८ सिट मात्र जितेको थियो । तर सन् २०२५ मा भने सो पार्टीले ६ गुणा बढी जित निकाल्दै ४८ सिट जित्नेतर्फ अगाडि बढेको छ ।
केजरीवालको नयाँ दिल्ली सिटमा २० जना उम्मेदवारको जमानत जफत भएको छ । उनीहरूले अत्यन्तै कम मत प्राप्त गरे । केजरीवाल प्रवेश वर्मासँग ३ हजार मतले पराजित भए ।
