काठमाडौँ। नेपाली काँग्रेसका सभापति गगनकुमार थापाले राजनीतिलाई सत्ता र शक्तिको संकुचित घेराबाट बाहिर निकालेर जनसेवाको मुख्य माध्यम बनाउनुपर्ने बताउनुभएको छ ।
शनिवार पार्टी केन्द्रिय कार्यालयमा आयोजित एक कार्यक्रममा बोल्दै उहाँले राजनीतिमा बढ्दै गएको पद र शक्तिको आशक्तिप्रति चिन्ता व्यक्त गर्नुभएको हो ।
नेपाली काँग्रेस केन्द्रिय नीति, अनुसन्धान तथा प्रशिक्षण प्रतिष्ठानद्वारा आयोजित ‘विपद पूर्वतयारी तथा प्रतिकार्य प्रशिक्षण’ कार्यक्रमको उद्घाटन गर्दै सभापति थापाले राजनीतिलाई सबैभन्दा ठूलो सार्वजनिक र मानव सेवाको क्षेत्रका रूपमा परिभाषित गर्नुभयो ।
नागरिक सेवा र मानव सेवाका लागि शक्ति र सत्तालाई साधन बनाउनुपर्नेमा केवल सत्ता प्राप्तिकै लागि मात्र राजनीति गर्ने अवस्थामा पुग्नु दुःखको विषय भएको उहाँको भनाइ छ । यो राजनीतिको उद्देश्यभन्दा फरक र विचलित बाटो भएको बताउनु भयो ।
पार्टीको ऐतिहासिक पृष्ठभूमि स्मरण गर्दै उहाँले संस्थापक नेताहरूले सत्ता वा शक्तिको अभिलाषा राखेर नभई विशुद्ध नागरिक सेवाको भावनाले पार्टी स्थापना गरेको उल्लेख गर्नुभयो । बदलिँदो परिवेशमा पार्टीका सामु नयाँ विषय र चुनौतीहरू थपिएको बताउँदै उहाँले सांगठनिक सुदृढीकरण र नीतिगत स्पष्टतालाई सँगसँगै लैजानुपर्ने आवश्यकता औंल्याउनु भयो ।
सभापति थापाले भन्नुभयो, ‘हामी राजनीतिमा आएको पनि त्यही भएर हो । राजनीतिभन्दा ठूलो सार्वजनिक सेवा अरू केही छैन । राजनीतिभन्दा ठूलो नागरिक सेवा वा मानव सेवा पनि केही होइन। नागरिक र मानव सेवा गर्न शक्ति भयो भने अझ धेरै गर्न सकिन्छ, सत्ता भयो भने अझ प्रभावकारी रूपमा गर्न सकिन्छ भन्ने सोचबाट हामी चिप्लिएर शक्ति र सत्ताकै लागि राजनीति गर्ने ठाउँमा पुग्यौँ । तर यो पार्टी स्थापना गर्ने संस्थापक नेताहरूले शुरुदेखि सत्ता र शक्तिलाई लक्ष्य बनाएका थिएनन् । यो पार्टी नागरिक सेवा र मानव सेवाकै भावनाबाट प्रारम्भ भएको हो । आज पार्टी नयाँ चरणमा आइपुगेको छ । नयाँ विषय छन्, नयाँ चुनौतीहरू छन् । म प्रतिष्ठानप्रति हार्दिक आभार व्यक्त गर्न चाहन्छु । यसले विषयवस्तुलाई जसरी पक्रेको छ र अत्यन्त व्यवस्थित ढङ्गले कार्यक्रम सञ्चालन गरिरहेको छ, त्यो प्रशंसनीय छ । हामी पार्टीका नियमित संगठनात्मक काम गर्दै जान्छौँ । त्यससँगै पार्टीको आत्मालाई जीवन्त राख्ने यस्ता वैचारिक र सामाजिक कार्यहरू पनि निरन्तर अघि बढाउँदै जानुपर्छ ।’
प्रतिष्ठानको कार्यशैलीप्रति सन्तोष व्यक्त गर्दै उहाँले पार्टीको मर्म र आत्मालाई बुझेर रचनात्मक कार्यहरू भइरहेको बताउनु भयो । एकातर्फ नियमित सांगठनिक गतिविधि र अर्कोतर्फ नीतिगत तथा प्रशिक्षणका कामहरू व्यवस्थित ढंगले अगाडि बढ्नु सुखद् पक्ष रहेको उहाँको भनाइ छ । –न्युज एजेन्सी नेपाल
