एजेन्सी । बलिउड अभिनेता सैफ अली खानमाथि हमला गर्ने अभियुक्त शरीफुल इस्लामका केही फिङ्गरप्रीन्ट अभिनेताको घरबाट लिएको नमूनासँग मेल खाएको छ ।
सैफमाथि १५ जनवरीको राति हमला भएको थियो । जनवरी २२ मा, मुम्बई पुलिसले फिङ्गरप्रीन्ट र अन्य नमूनाहरू संकलन गरी परीक्षणको लागि सीआईडी प्रयोगशालामा पठाएको थियो ।
मुम्बई प्रहरीका अनुसार सैफ अली खानमाथि आक्रमण गर्ने आरोपी शरीफुल इस्लामको फिङ्गरप्रीन्ट परीक्षणका लागि पठाइएका केही नमूनाको रिपोर्ट आइसकेको छ । केही फिङ्गरप्रीन्टहरू मिलेको छ । तर, प्रहरीले अन्तिम प्रतिवेदन पर्खिरहेको छ ।
अर्कोतर्फ सैफका दुई महिला कर्मचारीले बिहीबार (६ फेब्रुअरी) मा आरोपी शरीफुलको पहिचान पुष्टि गरे । आक्रमणको समयमा एरियाना फिलिप र जुनुलाई हालै मुम्बईको आर्थर रोड जेलमा बोलाइएको थियो ।
यद्यपि, शरीफुलका बुबा र उनका वकिलले सैफको आक्रमणकारी अरू नै भएको दाबी गर्दै आएका थिए । प्रहरीले सीसीटीभीमा कैद भएको अभियुक्तको अनुहारसँग शरीफुलको अनुहार मिलाउन अनुहार पहिचान परीक्षण गरेको थियो ।
प्रहरी हिरासत सकिएपछि अभियुक्त शरीफुल इस्लामलाई बुधबार (२९ जनवरी)बान्द्रा अदालतमा पेश गरिएको थियो । अदालतले आरोपितलाई १४ दिनको लागि न्यायिक हिरासतमा पठाएको थियो ।
