काठमाडौँ । राष्ट्रिय स्वतन्त्र पार्टी (रास्वपा)सभापति एवम् पूर्व गृहमन्त्री रवि लामिछाने चितवन जिल्ला अदालतमा उपस्थित भएका छन् ।
लामिछानेविरुद्धको मुद्दा जिल्ला अदालतका न्यायाधीश दयाराम ढकालको इजलासमा परेको छ ।
मंगलबार रविसहित १५ जना व्यक्ति र ६ वटा संस्थाविरुद्ध ठगी तथा संगठित अपराध अभियोगमा चितवन अदालतमा मुद्दा दर्ता भएको थियो । उनी हिजो नै चिवतन पुगेका थिए । लामिछानेमाथि ठगी कसुरमा मात्र मुलुकी फौजदारी कार्यविधि संहिता, २०७४ को दफा २४९ को उपदफा १ र २ विपरीत कसूर गरेको अभियोग लगाइएको छ ।
साहारा सहकारीको बचत रकम ठगी भएको भनिएको जम्मा रकम रू ५२ करोड ३२ लाख ८५ हजार ३०८ दशमलव ४७ रहेको छ । सरकारी वकील कार्यालयले ३८ करोड ९ लाख रुपैयाँ बिगो दाबीसहित मुद्दा दायर गरेको छ ।
यसैबीच, चितवन जिल्लाका न्यायाधिवक्ता शान्तिप्रसाद लुइँटेलको सरुवा गरिएको छ । उनलाई महान्याधिवक्ताको कार्यालय काठमाडौंमा तानिएको स्रोतले बतायो । उनको स्थानमा उच्च सरकारी वकिलको कार्यालय बुटवलका सरकारी वकिल रवि न्यौपानेलाई पठाइएको छ ।
