काठमाडौँ । सावर्स एक्सन हङकङ चीनको नेपालका लागि स्थानीय साझेदार स्वयंसेवी कोर्प्स नेपाल (भिसीएन) ले हेलम्बु गाउँपालिकाका बाढीपीडितलाई सबैभन्दा बढी प्रभावित २५ घरपरिवारलाई आश्रयसहित सहयोग गरेको छ ।
गत १ ,साउन १६ गते आएको बाढीले हेलम्बु गाउँपालिकाका ३१७ घरमा क्षति पुर्याएको थियो । सावर्स एक्सनले प्रकोपपछि तुरुन्तै बाढीको लागि आपतकालीन सहयोगका लागि भिसीएनसँग सहकार्य गरेको थियो। त्यसपछि तुरुन्तै रिकभरी प्रोजेक्ट प्रारम्भ गरी वडा नं ३, ४ र ७ मा २५ वटा घर निर्माण गरिएको थियो ।
यससँगै परियोजनाले क्यास फर वर्क योजना पनि ल्याएको छ, जसमा प्रभावित जनताले घर निर्माणमा काम गर्ने र कामको पारिश्रमिक पाउनेछन् । त्यसैगरी २५ परिवारसहित १२५ घरधुरीलाई कृषि औजार र चार वटा विभिन्न तरकारीको उच्च गुणस्तरको बीउ प्रदान गरी उनीहरुको कृषि गतिविधिलाई पुनरुत्थान गर्न सहयोग गरिएको थियो ।
गत पुस २८ गते हस्तान्तरण समारोह सम्पन्न भएको छ । समारोहमा २५ बाडीपीडितलाई सावर्स एक्सन र भिसीएनले घर प्रदान गरेका थिए । त्यसैगरी सोही कार्यक्रममा १२५ घरधुरीलाई कृषि सामग्री सहयोग गरिएको थियो ।
