विराटनगर । कोशी प्रदेश भ्रमणमा रहेकी पूर्वराष्ट्रपति विद्यादेवी भण्डारीले विराटनगरका युवा वैज्ञानिकहरुसँग अन्तक्र्रिया गर्नुभएको छ ।
कार्यक्रममा विराटनगर क्षेत्रमा कृयाशील युवा वैज्ञानिक, युवा इन्जिनियर, युवा प्राध्यापक र विज्ञान क्षेत्रका युवा विधार्थी सहभागी थिए।
आफ्नो कोशी प्रदेश भ्रमण शैक्षिक संस्थाहरुको भ्रमण रहेको र देशभरका युवाहरु सङ्ग आफू निरन्तर अन्तर्कियामा रहेको बताउँदै भण्डारीले नेपालको शिक्षामा आमुल परिवर्तनको आवश्यकता रहेको बताउनुभयो । आफ्नो ध्यान शिक्षा, विज्ञान तथा प्रविधि, स्वास्थ्य, जलवायु परिवर्तन र त्यसले पारेका असरहरुमा केन्द्रीत रहेको बताउँदै उहाँले अहिलेका समस्याको हल सामुहिक पहलकदमीबाट मात्र हुने बताउनुभयो।
विराठनगरसँग आफ्नो राजनैतिक मात्र नभइ भावनात्मक सम्बन्ध रहेको भन्दै उहाँले विराटनगरकै ठूलो क्याम्पस महेन्द्र मोरङ्ग क्याम्पसको शैक्षिक र भौतिक गुणस्तर बढाउन आफू निरन्तर कृयाशिल रहेको बताउनुभयो। कार्यक्रममा सहभागी युवा वैज्ञानिकहरुका समस्यालाई ध्यानपूर्वक सुन्दै ती समस्याको समाधानका लागि आफ्नो ठाउँबाट पहलकदमी लिने बताउनु भयो ।
खासगरी पाठ्यक्रममा समस्या, भौतिक असुविधा, अनुसन्धान वातावरणको अभावले युवा वैज्ञानिकहरु पलायन हुने अवस्था रहेको उल्लेख गर्दै त्यस अवस्थाको अन्त्यको लागि राज्यले आबश्यक पहलकदमी लिनुपर्ने बताउनुभयो। देशभित्र उत्पादन गर्न सकिने कृषि, वन र बनस्पती जन्य सामानहरु पनि उत्पादन नगर्दा अर्बौं रुपैयाँ देश बाहिर गएको र त्यो पैसा देशभित्र राख्न सक्दा शिक्षा र विज्ञान प्रविधिको विकासका लागि पूँजीको अभाव नहुने बताउँदै उत्पादनमुखी अर्थतन्त्र निर्माण गर्दै सबल र गरिमामय नागरिक जीवन निर्माणमा युवाहरुले भूमिका खेल्नुपर्ने कुरामा जोड दिनुभयो।
नेपालका विश्वविद्यालयहरुलाई अनुसन्धानमुखी बनाइ दक्ष जनशक्तिलाई देश निर्माणमा लगाउन आवश्यक रहेको तर्फ सरकारको ध्यानाकर्षण गराउने बताउनु भयो। नेपालको विकास र समृद्धिका लागि सम्भावनाहरुको खोजी गर्नु पर्ने कुरामा जोड दिँदै पूर्वराष्ट्रपति भण्डारीले युवाहरुको भूमिका आशाको सञ्चार गर्न निर्माणमा उल्लेखनीय हुने बताउनुभयो। देश निर्माणमा आफू निरन्तर लाग्ने भन्दै उाँले देशभरका युवासँग आफू निरन्तर संवादमा रहने बताउनुभयो।
कार्यक्रममा सहभागी युवा वैज्ञानिकहरुले आफ्ना कुराहरु पूर्वराष्ट्रपतिसँग निर्धक्क राख्न पाउँदा खुशी लागेको बताउदै शिक्षा, विज्ञान प्रविधि , स्वास्थ्य र जलबायु परिवर्तनका मुद्दामा पुर्व रास्ट्रपति लिने पहलकदमीमा आफूहरुको निरन्तर साथ र सहयोग रहने प्रतिवदता ब्यक्त गर्नु भयो।
