काठमाडौँ । नेकपा (माओवादी केन्द्र) निकटका बोर्ड सदस्यहरुले राष्ट्रिय खेलकुद परिषद् (राखेप)को बैठक बहिस्कार गरेका छन् । युवा तथा खेलकुद मन्त्रालय, सिंहदरबारमा बसेको १२० औं बोर्ड बैठकमा असन्तुष्टि जनाउँदै ती सदस्यहरुले बैठक बहिस्कार गरेका हुन् ।
बैठक बहिस्कार गर्नेहरुमा प्रकाश कुमार कुसारी, अञ्जन धमला र जनक प्रसाद बर्तौला रहेका छन् ।
‘बोर्ड बैठकमा युवा तथा खेलकुद मन्त्री तेजुलाल चौधरी र राखेप उपाध्यक्ष ध्रुव आचार्यले विविधको सन्दर्भमा कार्यकारी नियुक्ति गर्ने सम्बन्धमा कांग्रेस–एमाले गठबन्धनको सरकार रहेकाले दुई उहाँहरु हुनुपर्छ भन्दै दुई जनाको नाम प्रस्ताव गर्नुभयो निर्णयका लागि । त्यसपछि माओवादी निकट हामी तीन जना बहिस्कार गरेर निस्कियौँ ।’ बैठक बहिस्कार गर्ने एक सदस्यले न्यूजपोलारसँग भने ।
यस्तै असहमति जनाउनेमा एमाले निकटकी नन्दा बस्याल, विश्वविद्यालयबाट प्रतिनिधित्व गर्ने बोर्ड सदस्य डा मधुसुदन सुवेदी बिना श्रेष्ठ र अञ्जना श्रेष्ठ रहेका छन् । यी सदस्यहरुले पनि उक्त एजेण्डाको विरोध जनाएका छन् ।
यसका साथै ती सदस्यले २०८१ साल चैत २३ देखि ३० गतेसम्म कर्णाली प्रदेशमा हुने भनिएको दशौं राष्ट्रिय खेलकुद सञ्चालन हुन नसक्ने दाबी गरे ।
उनले भने ‘आर्थिक नम्स पास भएको छैन । सार्वजनिक खरिद प्रक्रियाको कुरा छ । चैतमा प्रतियोगिता नहुनेवित्तिकै बैशाख र जेष्ठमा कक्षा ११–१२ को परीक्षा हुन्छ । खेलाडीहरु ११–१२ पास गरेकाहरु नै बढी हुन्छन् । त्यसैले असारमा जान सक्छ । असारमा पुगेपछि बर्खा लाग्छ, क्लोजिङको समयमा कसरी दशौं राष्ट्रिय खेलकुद हुन सक्छ ?’
