काठमाडौं । टर्कीको उत्तरपश्चिमस्थित एक स्की रिसोर्ट होटलमा आगलागी हुँदा ७६ जनाको मृत्यु भएको छ । आगलागीमा परेर ५० जनाभन्दा धेरै घाइते भएका छन् ।
बोलु प्रान्तको कार्तलकायामा अवस्थित १२ तले ग्राण्ड कार्तल होटलको चौथो तलामा रहेको रेष्टुरेन्टबाट आगो सल्किएको थियो । त्यतिबेला होटलमा २ सय ३४ पाहुना रहेको बताइएको छ ।
आगलागीपछि कतिपय मानिसहरु होटलको माथिल्लो तलाबाट हामफालेका थिए । हामफाल्दा दुई जनाको मृत्यु भएको थियो । अन्यको मृत्यु धुँवामा निसास्सिएर भएको थियो ।
टर्कीका गृहमन्त्री अलि येरलिकायाले घटनास्थलको निरीक्षणपछि ७६ जनाको मृत्यु र कम्तिमा ५० जना घाइते भएको जानकारी पत्रकारहरुलाई दिएका छन् । उनले यो घटनाबाट सरकार दु:खी भएको बताए ।
