काठमाडौं । पूर्व स्वास्थ्य मन्त्री तथा नेपाली कांग्रेसका नेता गगन थापाले डा. गोविन्द केसीमाथि मंगलबार दिउँसो प्रहरीले गरेको दुर्व्यवहार वर्तमान सरकारको क्रुर कार्यको पनि पराकाष्ठा हो भनेका छन् ।
आज नेपालगन्जबाट काठमाडौँ ल्याइएका डा. केसीलाई प्रहरीले वीर अस्पतालको ट्रमा सेन्टरअघि लछारपछार गरेको थियो । उनले शिक्षण अस्पताल जान खोजेका थिए भने प्रहरीले त्यहाँ जान नपाइने भन्दै सोही सेन्टरमा भर्ना गर्न खोजेको थियो । उनको इच्छा विपरीत प्रहरीले लछारपछार गर्दै राष्ट्रिय ट्रमा सेन्टरमा लगेपछि गगन थापाले यो प्रतिक्रिया दिएका हुन् । गगन थापाले ट्वीट गरेर यस्तो प्रतिक्रया जनाएका हुन् ।
उनले सो ट्वीटमा भनेका छन् 'सत्याग्रहीमाथिको दुर्व्यवहार वर्तमान सरकारको क्रुरताको पराकाष्ठा हो ।' उनले सत्याग्रहीलाई इच्छा विपरीत छुन पनि पाईंदैन तर अनसनरत डा.गोविन्द केसीमाथि सरकारले गरेको अपमानजनक व्यवहार गरेर जबर्जस्ती कामाठाडौं ल्याएको बताएका छन् । उनले प्रहरीको यो कार्य लोकतन्त्रमा अकल्पनीय र अक्षम्य छ भनेका छन् । थापाले ट्विटरमा लेखेका छन्, ‘क्रुर तानशाहले मात्र यस्तो निन्दनीय कृत्य गर्नसक्छ । सरकारले आफ्नो पतनको बाटो आफै खनेको छ ।’
यसैबीच पूर्व प्रधानमन्त्री डा. बाबुराम भट्टराईले पनि डा.केसीमाथिको दुर्व्यवहारको विरोध गरेका थिए । उनले पनि ट्वीट गरेर सरकारले निर्लज्ज काम गरेको बताएका थिए ।
