काठमाडौं । दुई दिनदेखि अविरल रुपमा परेको पानीका कारण आएको पहिरोले पाल्पाको रम्भा गाउँपालिकाको फोक्सिङकोट बेलौजामा बिहीबार बिहानै तीन घर पुरिएका छन् । पहिरोमा परी पुरिएका ती घरका ६ जना बेपत्ता भएका छन् ।
बेलौजा स्वास्थ्य चौकी नजिकै खसेको ठूलो पहिरोले तीन घर पुरिएको हो । उक्त स्थानका एकजना स्थानीय हुमबहादुर गाहा र मनबहादुर गाहाको घर पुरिएको र ती घरका पाँच जना बेपत्ता भएका बताइएको छ। स्थानीयले जनाएअनुसार मनबहादुर गाहाको परिवारका तीन जना भने पहिरो खसेपछि पनि भागेर ज्यान जोगाउन सफल भएका छन् । उता हुमबहादुरको परिवारका पाँच जना सदस्यहरु सुतिरहेको अवस्थामा पहिरो आएकोले सम्पर्कविहीन भएका छन् ।
त्यसैगरी अविरल वर्षापछिको पहिरोले घर पुरिएर फोक्सिङ्कोटकै सुरुमडाँडाकी एक जना गर्भवती महिला पनि बेपत्ता भएकी ती स्थानीयले बताए । उनका श्रीमान् पहिरो खसे पछि भागेका र उनी पहिरोमा परेकी थिइन् । त्यस क्षेत्रमाा अहिले पनि अविरल वर्षा जारी रहेकोले पहिरो खस्ने क्रम नरोकिएको र यसका कारण उद्धारमा समस्या भएको पाल्पाको रम्भा गाउँपालिका अध्यक्ष विष्णुप्रसाद भण्डारीले जानकारी दिएका छन् ।
