काठमाडौँ । काठमाडौँ जिल्ला अदालतमा आज सुरु भएको राष्ट्रिय स्वतन्त्र पार्टी (रास्वपा) का सभापति रवि लामिछानेको बयान सकिएको छ ।
तर अदालतले थुनछेक बहसको बाँकी कार्य नसकिएको भन्दै रविलाई प्रहरीको जिम्मा लगाएको छ । अदालतको आदेशपछि रविलाई काठमाडौं जिल्ला प्रहरी परिसरको हिरासतमा पठाइएको छ ।
न्यायाधीश माधव अधिकारीको इजलासमा भएको बहसमा रवि पक्षका कानुन व्यवसायीहरु सुशील पन्त र रमण श्रेष्ठले भने रविलाई परिवार वा कानुन व्यवसायीको जिम्मा लगाउन माग गरेका थिए ।
स्वर्णलक्ष्मी सहकारी ठगीको आरोप लागेका उनी आजै जिल्ला अदालतमा उपस्थित भएका थिए ।
लामिछानेविरुद्ध संगठितरूपमा ठगी गरेको आरोप छ । सो प्रकरणमा रबिसहित ३९ जनाविरुद्ध पुस २१ गते काठमाडौंमा मुद्दा दायर भएको थियो ।
लामिछाने गत बिहीबार कास्की जिल्ला अदालतबाट ६५ लाख धरौटी तिरेर छुटेका थिए । कास्कीको पोखरामा रहेको सूर्यदर्शन सहकारी ठगीमा पनि उनी प्रतिवादी थिए ।
तस्वीर : गोपाल दाहाल/रासस
