काठमाडौं । मंगलबार बिहान भूकम्पको धक्काले आत्तिएका एक व्यक्तिले घरको छतबाट हाम फालेका छन् ।
काठमाडौँको स्युचाटारस्थित घरको छतबाट हामफाल्दा एक जना घाइते भएका नेपाल प्रहरीले जनाएको छ । उनको अहिले उपचार भईरहेको छ ।
यस्तै, बाराको कलैया देवकोटास्थित त्रिचन्द्र माविका कक्षा ७ र ८ मा पढ्ने ११ जना विद्यार्थी बेहोस भएका छन् । उनीहरुको उपचारपछि डिस्चार्ज भइसकेको प्रहरीले जनाएको छ ।
भूकम्पबाट सिन्धुपाल्चोकको भोटेकोसी गाउँपालिका ४ स्थित प्रहरी चौकी भवन र रामेछापमा एउटा गोठमा क्षति पुगेको छ । ओखलढुंगा र सोलुखुम्बुमा पनि केहि घरमा क्षति पुगेको प्रहरीको भनाइ छ ।
आज बिहान ६ बजेर ५० मिनेट जाँदा चीनको जिजाङ्ग प्रान्तको सिगात्सेस्थित दिङ्गी गाउँमा केन्द्रविन्दु भएर ६.८ म्याग्निच्युडको भूकम्प गएको गएको थियो । सो भूकम्पको धक्का नेपालका बागमती, कोशी र मधेश प्रदेशका जिल्लाहरुमा महसुस भएको थियो ।
