काठमाडौँ । नेकपा एमालेबाट निष्कासित नेता डा. भीम रावलले आफ्नो ४९ वर्षको पार्टी सदस्यता खोस्ने र ५१ वार्षको राजनीति सक्काउने काम अध्यक्ष केपी शर्मा ओलीले गरेको आरोप लगाएका छन् ।
बुधबार काठमाडौंमा पत्रकार सम्मेलन आयोजना गर्दै उनले यस्तो बताएका हुन् ।
‘माधव नेपाल र झलनाथ खनालविरुद्ध तपाई अध्यक्षतामा उठ्दा केही नहुँने म तपाई विरुद्ध उठ्दा निष्कासन हुने यो कस्तो व्यवस्था हो ? अध्यक्षको उम्मेदवार बन्न के आधार हुनुपर्ने रहेछ र मलाई कारबाही गरियो ? यो कस्तो ओलीको हुकुमत हो ? रावलले ओलीलाई प्रश्न गरे । ‘के पार्टी अध्यक्षमा निश्चित भूगोल र शिक्षाको सीमा भएकाले मात्र उमेदवारी दिने हो ?’
एमालेमा आफूले गरेको संघर्ष र विभिन्न कमिटीमा रहेर गरेका कामहरूको बारेमा संक्षेपमा स्मरण गर्दै उनले भने ‘सदस्यता नै खोसिएपछि विकल्प खोज्न बाध्य भएँ । ममाथि पूर्वाग्रह राखेर कारबाही गरियो ।’
रावललाई गत पुस १० गते बसेको एमाले सचिवालय बैठकले पार्टीको साधारण सदस्य नरहने गरी हटाएको थियो । आफूलाई चितवनमा सम्पन्न महाधिवेशनमा अध्यक्षमा केपी शर्मा ओलीसँग प्रतिस्पर्धा गरेको भन्दै कारबाही गरिएको उनले जिकिर गरे ।
रावलको पत्रकार सम्मेलन जारी छ ।
