काठमाडौं । पोखराको सूर्यदर्शन सहकारीको बचत रकम अपचलन मुद्दाका आरोपीहरूको बयान आज पनि जारी रहने भएको छ । कास्की जिल्ला अदालतमा हिजो छविलाल जोशीको बयान भएकोमा आज रास्वपा सभापति रवि लामिछानेलगायतको हुने बताइएको छ ।
प्रतिवादी लामिछाने र जोशीसहित लीला पछाइ, कृष्णबहादुर गुरुङ र रामबहादुर खनाललाई हिजो अदालतमा उपस्थित गराइएकामा जोशीको मात्र बयान लिइएको थियो ।
जिल्ला न्यायाधीश नीतिज राईको इजलासमा जोशीको बयान लिइएको हो । अन्य प्रतिवादीको बयान आजदेखि सुरु हुने भएको हो । सबै प्रतिवादीहरूको बयान सकिएपछि मात्र थुनछेकको बहस र आदेश हुने छ ।
यसअघि आइतबार जिल्ला सरकारी वकिल कार्यालय, कास्कीले सहकारीको रकम अपचलनको आरोपमा रास्वपा सभापति लामिछानेलगायत विरुद्ध मुद्दा दायर गरेको थियो । लामिछानेमाथि सहकारी ठगीसँगै सङ्गठित अपराध र सम्पत्ति शुद्धीकरण कसुरमा समेत मुद्दा दायर भएको छ । सरकारी वकिल कार्यालयले सूर्यदर्शन सहकारीको रकम ठगी प्रकरणमा हालसम्म ६३ जनाविरुद्ध जिल्ला अदालत कास्कीमा मुद्दा दायर गरिएको जनाएको छ ।
लामिछानेसहित १९ जनाविरुद्ध सङ्गठित अपराधमासमेत मुद्दा चलाइएको छ । यस्तै लामिछानेसँगै रामबहादुर खनाल, छविलाल जोशी र लीला पछाइविरुद्ध सम्पत्ति शुद्धीकरणमा मुद्दा दायर गरिएको छ ।
