ब्रिस्बेन: अस्ट्रेलियाको ब्रिस्बेनमा भएको भारत–अस्ट्रेलिया बीचको तेस्रो टेस्ट क्रिकेट बराबरीमा समाप्त भएको छ । यसअघि दुबै टिमले एक एक खेल जितेर पाँच म्याचको शृंखला बराबरीमा रहेको छ ।
बर्षाले प्रभावित यस खेलको अन्तिम दिन समेत बर्षाले पटकपटक अबरुद्ध बनेको थियो ।
यसअघि पहिलो दिन टस जितेर भारतले अस्ट्रेलियालाई ब्याटिङको निम्तो दिएको थियो । अस्ट्रेलियाले पहिलो इनिङमा ट्राभिस हेड र स्टिभन स्मिथको शतकका मद्दतले ४४५ रन बनाएको थियो ।
तर भारतले भने पहिलो इनिङमा खासै उत्साहजनक प्रदर्शन गर्न सकेको थिएन । फलो अनमा पर्ने सम्भावना बीच भारतका अनुभवी अलराउन्डर रबिन्द्र जडेजाले ७७, के एल राहुलले ८० तथा आकाश दीपले ३१ रनको मद्दतले २६० रनमा अलआउट हुँदै फलो अन जोगाएको थियो ।
यसपछि दोस्रो इनिङमा ब्याटिङमा उत्रेको अस्ट्रेलियाले छिटोछिटो रन बनाउने क्रममा ८९ रनमा सात विकेट गुमाएको थियो । तर भारतसामु जितका लागि २७५ रन बनाउनुपर्ने चुनौतीपूर्ण लक्ष्य थियो ।
पाँचौं दिन करिब ५२ ओभरमा २७५ रन बनाउनुपर्ने लक्ष्य पछ्याउन भारतलाई कठिन नै थियो, तर भारतले स्कोरबोर्डमा ८ रन बनाउँदै वर्षाले खेल अबरुद्ध भयो र अन्तत: खेल बराबरीमा सकियो । एजेन्सी
