काठमाडौं विश्वविद्यालयको यही मंसिर २९ गते हुने ३०औं दीक्षान्त (पहिलो चरण) को समारोहमा एक हजार २५६ जना विद्यार्थी दीक्षित हुने विश्वविद्यालयले जनाएको छ ।
प्रधानमन्त्री तथा कुलपति केपी शर्मा ओलीको अध्यक्षतामा हुने समारोहमा भारतीय प्रौद्योगिक संस्थान (इन्डियन इन्स्टिच्युट अफ टेक्नोलजी) पटनाका निर्देशक प्रा.डा. टी.एन. सिंहको प्रमुख आतिथ्य र शिक्षा, विज्ञान तथा प्रविधिमन्त्री तथा सहकुलपति विद्या भट्टराईको उपस्थिति हुने तय भएको विश्वविद्यालयद्वारा जारी विज्ञप्तिमा उल्लेख छ ।
समारोहमा विश्वविद्यालयका आर्ट्स, एजुकेसन, इन्जिनियरिङ, ल, म्यानेजमेन्ट, मेडिकल साइन्सेज र साइन्स सङ्कायका पीएचडी तहका ३ जना, पीजिडी तहका ५१ जना, एमफिल तहका ३३ जना, स्नातकोत्तर तहका ३ सय ८५ जना, स्नातक तहका ७ सय ८४ जना दीक्षित हुन लागेको विश्वविद्यालयले जनाएको छ ।
स्नातक तर्फ मानविकीका १११ जना, शिक्षा संकायका २५३ जना, इन्जिनियरिङका ७७ जना, कानुनका ३९ जना, व्यवस्थापन संकायका ४६५ जना, मेडिकल साइन्सेजका १८१ जना र विज्ञान संकायका १३० जना रहेका छन् ।
दीक्षित हुने विद्यार्थीहरूमध्ये पुरुषको सङ्ख्या ६ सय १५ (४८.९६ प्रतिशत) र महिलाको सङ्ख्या (६ सय ४१) ५१.०४ प्रतिशत रहनेछ । दीक्षित हुनेमध्ये भारत, चीन, श्रीलङ्का, बाङ्लादेश, बेलायत, संयुक्त राज्य अमेरिका, फ्रान्स, इरान र भूटान गरी ९ देशका ७५ जना विदेशी विद्यार्थी रहनेछन् । तीमध्ये स्कुल अफ आर्ट्सका १७ जना, स्कुल अफ एजुकेसनका ५ जना र स्कुल अफ मेडिकल साइन्सेजका ५३ जना रहेका छन् ।
काठमाडौं विश्वविद्यालयको इतिहासमा पहिलोपटक स्कुल अफ आर्ट्सको Master in Urban Studies मा ५ जना, Master in Media Studies मा १ जना र Master of Fine Arts मा २१ जनालाई पहिलोपटक उपाधि प्रदान गरिने भएको छ ।
त्यसैगरी स्कुल अफ एजुकेसनको Master in Indigenous Education and Development मा १९ जना र Master in Training and Development मा १२ जनालाई पहिलोपटक उपाधि प्रदान गरिनेछ । स्कुल अफ इन्जिनियरिङको Master in Health Informatics मा २ जना र M. Tech. in Energy Systems (Joint Degree with IIT, Madras) मा ४ जनालाई पहिलोपटक उपाधि प्रदान गरिनेछ ।
स्कुल अफ मेडिकल साइन्सेजको Bachelor of Science in Medical Imaging Technology मा ८ जना र Bachelor of Science in Laboratory Medicine मा १० जनालाई पहिलोपटक उपाधि प्रदान गरिनेछ ।
तीसौं दीक्षान्त (पहिलो चरण) सम्ममा काठमाडौं विश्वविद्यालयबाट कूल ४६ हजार ६९३ जना दीक्षित भएका छन् । तीमध्ये ५७ देशका ५ हजार ५४२ जना विदेशी विद्यार्थी रहेको काठमाडौं विश्वविद्यालयका प्रवक्ता एक्कुमाया पुनले बताउनुभयो ।
