काठमाडौं । प्रधानमन्त्री वालेन्द्र शाहले आज नेपालका प्रमुख निर्यातजन्य उद्योग–व्यवसायसँग आबद्ध प्रतिनिधिहरूसँग छलफल गर्ने कार्यक्रम तय भएको छ।
प्रधानमन्त्री तथा मन्त्रिपरिषद्को कार्यालयमा बिहान ११:३० बजे हुने छलफलमा नेपाल प्लाइउड उत्पादक सङ्घका अध्यक्ष होमप्रसाद घिमिरे, नेपाल गलैंचा उत्पादक तथा निर्यातकर्ता सङ्घका अध्यक्ष बलराम गुरुङ, नेपाल पश्मिना उद्योग सङ्घका अध्यक्ष धनप्रसाद लामिछाने, कार्पेट तथा प्लाइउड निर्यातकर्ता देवानन्द सरावगी तथा नेपाल डग च्यु उत्पादक सङ्घका अध्यक्ष रेशमबहादुर पोखरेल सहभागी हुनेछन्।
छलफलका क्रममा निर्यात प्रवर्द्धनमा देखिएका चुनौती, नीतिगत सुधारका आवश्यकता तथा निर्यात वृद्धि गर्न अपनाउन सकिने व्यावहारिक उपायबारे प्रधानमन्त्री शाहले उद्योगी–व्यवसायीसँग राय–सुझाव लिने कार्यक्रम रहेको छ।
प्रधानमन्त्री शाहले पछिल्लो समय देशको अर्थतन्त्र सुदृढीकरण, उत्पादन तथा निर्यात प्रवर्द्धनका विषयमा निजी क्षेत्रका उद्योगी–व्यवसायी र सम्बन्धित सरोकारवालासँग निरन्तर संवाद गर्दै आउनुभएको छ। सरकारले निजी क्षेत्रसँगको सहकार्यमार्फत लगानी, उत्पादन र निर्यात अभिवृद्धि गर्ने रणनीतिलाई प्राथमिकतामा राखेको जनाएको छ।
