काठमाडौं ।
जन्मनुपर्छ हरेक मानिस लिएर नौलो आश
गुराँस बिहान देखाई भन्छु, बदलिँदो आकाश
गीतकार नगेन्द्र थापाले चलचित्र बदलिँदो आकाशका निम्ति लेख्नु भएको यो गीतलाई गोपाल योञ्जनको संगीतमा नारायणगोपालले स्वर दिनुभएको हो । यो गीत सुन्दा हृदयस्पर्श हुन्छ । यी र यस्तै कालजयी स्वरका शिखर तथा स्वरसम्राट नारायण गोपालको आज ३४औं स्मृति दिवस । नेपाली चलचित्रको पाश्र्व गायनको इतिहासमा सुनौलो अक्षरले नारायण गोपालको नाम लेखिएको छ ।
उहाँले कालजयी गीतहरु चलचित्र परिवर्तनको ‘बुझ्नै सकिनौ तिमीले, आँखाको भाखा मेरो, हजार अर्थ अरुले लाएर के गरुँ ? चलचित्र चिनोको ‘मोहनी लाग्ला है, गाउँलेको बोलीले’, सिन्दुर चलचित्रको ‘लुकुँलुकँु लाग्यो मलाई’, ‘कान्छी’ चलचित्रको ‘छोरीको जन्म हारेको कर्म’मा स्वर दिनुभएको थियो ।
मन्दिरमा छ की मूर्तिमा माया
पत्थरमा छ की धुलोमा माया !!
कोइ त देखाउ केही त बताउ
गरिबमा छ की धनीमा माया !!!
चलचित्र मायाका लागि वरिष्ठ गीतकार किरण खरेलको शब्द र संगीतरत्न तथा मेलोडी किङ शम्भुजीत बासकोटाको संगीतमा स्वरसम्राट नारायण गोपालले गाउनुभएको यो, यी र यस्तै पाश्र्व तथा अन्य गायिकीले नारायणगोपाल संगीतको शिखरमा पुर्यायो र टिकाई राख्यो ।
नारायण गोपालले नयाँ पुस्तासँग राम्रो सहकार्य गर्नुभयो । जसमा शम्भुजीत बासकोटासित ‘माया’ सिनेमामा ‘आँखैमा कसैको तस्बिर बसेछ …’ र ‘मन्दिरमा छ की मूर्तिमा माया’ जस्ता गीत गाउनुभयो ।
चलचित्रको पाश्र्व गायनमा नारायणगोपालले गोपाल योञ्जन, रञ्जीत गजमेर, भूपेन्द्र रायमाझीको संगीतमा पनि विभिन्न चलचित्रका स्वर दिनुभएको थियो । त्यस समयमा गायनमा नारायणगोपालसित प्रतिस्पर्धामा उनका समकालीन कोही थिएनन् ।
समकालीन नेपाली आधुनिक गीत, संगीतको कुरा आउनासाथ जनस्तरबाटै घोषणा गरिएको स्वर सम्राटको उपाधि प्राप्त नारायणगोपालको नाम आइहाल्छ । पञ्चायतकालमा संगीत र गायनको शिखरमा पुगेका नारायणगोपालको उचाई २०४६ सालको राजनीतिक परिवर्तनपछि अझ माथि पुगेको थियो । तर स्वर सम्राट यी होनाहार व्यक्तिको २०४७ साल मंसिर १९ गते ५१ वर्षकै उमेरमा निधन भयो । राष्ट्रले एक महान व्यक्ति गुमायो । गीत संगीतको क्षेत्र टुहुरो बनाएर विदा हुने तिनै स्वर सम्राटका बारेमा हरेक वर्ष मंसिर १९ गते विवेचना हुने गर्दछ, स्मरण गरिन्छ, पुरस्कारहरु वितरण गरिन्छ र उनीसँग उठबस गरेका व्यक्तिका स्मरणहरु नयाँ पुस्तालाई सुनाइन्छ ।
कालजयी गीतका सर्जक तथा जादूमय स्वरका धनी स्वरसम्राट नारायणगोपालको जन्म बुबा आशगोपाल गुरुवाचार्य र आमा रामदेवी गुरुवाचार्यको कोखबाट १९९६ असोज १८ गते काठमाडौंमा भएको थियो ।
