काठमाडौं । चौथो सातामा प्रदर्शनरत नेपाली चलचित्र ‘पूर्णबहादुरको सारंगी’ले बक्स अफिसमा थुप्रै रेकर्ड राखेको छ ।
यसैबीच, अहिलेसम्मकै सर्वाधिक हिट चलचित्र पूर्णबहादुरको सारंगीविरुद्ध प्रतिलिपि अधिकार रजिष्ट्रारको कार्यालय, दरवारमार्गमा उजुरी परेको छ ।
चलचित्र निर्माता तथा कलाकार अजित लामिछानेले आफ्नो चलचित्र ‘लाज’को कथा र केही प्लटहरु लिएर चलचित्र पूर्णबहादुरको सारंगी बनाएको भन्दै प्रतिलिपि अधिकार रजिष्ट्रारको कार्यालयमा कथा चोरी सम्बन्धि उजुरी दिएका हुन् ।
अजित लामिछाने चलचित्र लाजका लेखक समेत हुन् । अजितकै लेखनमा यस अघि लघु चलचित्र लाज निर्माण भएको थियो । चलचित्र लाज विभिन्न अन्तराष्ट्रिय चलचित्र महोत्सवमा प्रदर्शन भईसकेको छ । जसमा अजित आफैंले कलाकारको रुपमा समेत काम गरेका थिए ।
सोही कथालाई परिमार्जन गरेर कथानक चलचित्र लाज निर्माण गर्नको लागि आफूले पूर्णवहादुरको सारंगीका निर्माता एवम् बाँसुरी फिल्मस्का अध्यक्ष रामबाबु गुरुङलाई लाजको स्कृप्ट दुई वर्ष अघि पठाएको लामिछानेको भनाई छ ।
आफूले चलचित्र लाजको कथा दुई वर्ष अघि पूर्णबहादुरको सारंगीका निर्देशक सरोज पौडेललाई पनि सुनाएको कलाकार तथा लेखक लामिछानेले प्रतिलिपि अधिकार रजिष्ट्रारको कार्यालयमा दिएको उजुरीमा जिकिर गरेका छन् ।
तर यतिबेला चलचित्र पूर्र्णबहादुरको सारँगी हेरेपछि आफ्नो चलचित्र लाजको कथा र प्लट चोरिएको जानकारी पाएको लेखक तथा कलाकार अजित लामिछानेले उजुरीमा उल्लेख गरेका छन् ।
चलचित्र लेखक तथा कलाकार लामिछानेले निर्माणधिन चलचित्र लाजको स्कृप्ट प्रतिलिपि अधिकार रजिष्ट्रारको कार्यालयमा २०७७ पुष १३ गते दर्ता गराएर प्रमाणपत्र समेत लिएका थिए । सो प्रमाणपत्रमा चलचित्र लाजको स्कृप्ट २०७१ सालमै लेखिएको पनि उल्लेख गरिएको छ ।
चलचित्र पूर्णबहादुरको सारंगीलाई कथा चोरीको आरोप दोश्रो पटक लागेको हो । यसअघि पनि नवलपुरका पत्रकार एवम् लेखक डा. श्यामशंकर बस्यालले आफ्नो उपन्यास ‘संग्रामपुर’को कथा चोरेर चलचित्र पूर्णबहादुरको सारंगी निर्माण गरेको आरोप लगाएका थिए ।
पूर्णबहादुरको सारंगीलाई सरोज पौडेलले निर्देशन गरेका हुन् भने महेश दवाडीको पटकथा तथा संवाद रहेको छ ।
फिल्ममा विजय बराल, प्रकाश सपुत, मुकुन भुसाल, अञ्जना बराईली लगायतको अभिनय छ ।
