काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेलाई भोलि काठमाडौँ ल्याइने भएको छ । कात्तिक २ गते सहकारी ठगीमा काठमाडौंबाट पक्राउ गरेर पोखरा पुर्याइएका उनलाई बयानका लागि काठमाडौँ ल्याइने भएको हो ।
हिजो (आइतबार) मात्रै लामिछानेलाई हिरासतमा राख्न थप १५ दिनको म्याद थपिएको थियो । हाल उनीविरुद्ध सहकारी ठगीसँगै सङ्गठित अपराध र सम्पत्ति शुद्धीकरणमा अनुसन्धान भइरहेको छ ।
सङ्गठित अपराधमा ६० दिनभन्दा बढी हिरासतमा राख्न पाइँदैन तर सम्पत्ति शुद्धीकरणमा अनुसन्धान भएकाले ९० दिनसम्म राख्न पाइने भएकाले म्याद थप भएको हो ।
पोखराको सूर्यदर्शन सहकारीसँगै रुपन्देहीको सुप्रिम सहकारीको रकम हिनामिनामा पनि लामिछानेको संलग्नता भएको भन्दै उनलाई रुपन्देही पुर्याएर ३० घण्टासम्म बयान गरिएको थियो ।
त्यस्तै, जिल्ला अदालत काठमाडौंबाट पनि पक्राउ पुर्जी जारी भएकाले उनलाई काठमाडौं ल्याइने भएको हो ।
