काठमाडौं । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहालले चिनियाँ कार्डबारे नेकपा एमालेले जारी गरेको वक्तव्यप्रति कडा टिप्पणी गर्नुभएको छ । दाहालले एमालेको वक्तव्यलाई ‘खुदा पहाड, निक्ला चुहा’ भन्दै यसको कुनै अर्थ नरहेको बताउनुभएको हो ।
ग्लोबल न्यूज नेटवर्कमा अन्तरवार्ताका क्रममा माओवादी केन्द्रका अध्यक्ष दाहालले प्रधानमन्त्री केपी शर्मा ओलीको चीन भ्रमणको तयारीको बारेमा दिएको चिनियाँ कार्डबारे अभिव्यक्तिलाई लिएर एमालेले गरेको वक्तव्यलाई खुदा पहाड, निक्ला चुहाबाहेक एमालेले केही पनि नपाउने टिप्पणी गर्नुभएको हो ।
यो पनि पढ्नुहोस- प्रधानमन्त्रीले ‘चिनियाँ कार्ड’ प्रयोग गर्न खोजेको भन्ने प्रचण्डको अभिव्यक्तिमा एमालेको आपत्ति
उहाँले प्रधानमन्त्री ओलीको प्रवृत्तिको बारेमा आफूले टिप्पणी गरेको दाबी गर्नुभयो । प्रधानमन्त्री ओलीले तथाकथित राष्टवादको नाममा भ्रम दिने कोशिस गरेको देखिएको आरोप उहाँले लगाउनुभएको छ ।
चिनियाँ कार्डबारे ग्लोबल न्यूज नेटवर्कमा दिएको दाहालको स्पष्टोक्ति–
केपीजीको प्रवृत्ति जो प्रतिशोधमा देखिएको छ । लोकतन्त्रका विरुद्ध देखिएको छ । उहाँले तथाकथित राष्ट्रवादको नाममा भ्रम दिने कोशिस गरेको देखिन्छ । मलाई योपनि त थाहा छ–उहाँले सकेसम्म बल त भारत भ्रमण गर्न खोजेको भन्ने सूचनाहरु त आईरहेको छ । नमिलेपछि चीन भनेको देखेपछि मैले यो चाहीँ के कार्ड खेल्न खोजेको हो भनेर प्रश्न पो उठाएको हुँ । यत्तिलाई उहाँहरुले अब ठुलै चिज पाईयो, प्रचण्डले धेरै ठूलो मिस्टेक गर्यो भनिकन वक्तव्य दिनुभएको छ । मलाई लाग्छ उहाँहरुले खुदा पहाड, निक्ला चुहाबाहेक केही पाउनुहुने छैन् ।
उहाँहरुले मनोगत रुपमा, किनभने अहिले सरकार अप्ठ्यारोमा पर्दै गएको छ । उहाँहरुले डूबते को तिनके का सहाराको रूपमा प्रयोग गर्न खोजेको हो कि भन्ने मलाई परेको छ । केपीजीको प्रवृत्तिमाथि मेरो प्रश्न हो । मेरो मनमा त्यो प्रश्न कायमै छ । उहाँ (केपीजी) ले न्यूयोर्कमा मोदीसँग बस्दा मोदीलाई निम्तो दिएको कुरा आएको छ । त्यो भनेको उहाँले निम्तो पनि मागेको हो नि। भारत वा चीन पहिले भन्ने प्रश्न होइन ।
