काठमाडौँ । प्रहरीले कञ्चनपुरकी निर्मला पन्तको बलात्कारपछि हत्या भएको घटनामा आफू प्रत्यक्षदर्शी रहेको बताउने व्यक्तिलाई नियन्त्रणमा लिएको छ ।
एक टेलिभिजनमा अन्तर्वार्ता दिँदै पन्तको हत्या भएको घटनाको आफू प्रत्यक्षदर्शी बताउने गोरखा घर भई काठमाडौं बस्ने नवराज अर्याललाई प्रहरीको केन्द्रीय अनुसन्धान ब्युरो (सिआइबी)ले बुधबार नियन्त्रणमा लिएको हो ।
सिआइबीले उनलाई मंगलबार चार घन्टा सोधपुछ गरेका थिए । बुधबार फेरि सिआइबीमा हाजिर हुन आउन भने पनि सम्पर्कबिहीन भएपछि उनलाई पक्राउ गरिएको प्रहरीले जनाएको छ ।
अन्तरवार्ता लिएका पत्रकार ऋषि धमला पनि सिआइबी कार्यालय उपस्थित भएका छन् ।
धमला प्रस्तोता रहेको अन्तर्वार्तामा अर्यालले आफू प्रत्यक्षदर्शी भएको र अभियुक्त को हो भन्नेसमेत थाहा भएको दाबी गरेका थिए ।
२०७५ साल साउन १० गते निर्मला पन्तको बलात्कारपछि हत्या भएको थियो । उक्त घटनाका दोषि अहिलेसम्म पनि पत्ता लाग्न सकेको छैन ।
