काठमाडौं । नेपाली कांग्रेसका सभापति शेरबहादुर देउवाले सोमबार शीर्ष नेताहरुको बैठक बोलाएका छन् । देउवाले पार्टीभित्रको विवादमा समाधान पहिल्याउन शीर्ष तहका नेताको बैठक डाकेका हुन्।
यो छलफललाई १७ असोजको बैठकको निरन्तरता मानिएको छ । देउवाले पार्टीका पदाधिकारी, पूर्वपदाधिकारी लगायतसँग छलफल गर्न लागिएको सहमहामन्त्री डा. प्रकाशशरण महतले जानकारी दिए ।
शीर्ष नेताहरुको बैठक यसअघि वरिष्ठ नेता रामचन्द्र पौडेल समूहले अघि सारेको मागबारे छलफल गर्न १७ असोजमा बसेको थियो । १९ गते केन्द्रीय कार्यसमिति बैठक बस्ने भनिएपनि केही केन्द्रीय सदस्यलाई कोरोना संक्रमण पुष्टि भएपछि शीर्ष नेताहरुको छलफल र केन्द्रीय कार्यसमिति बैठक दुवै प्रभावित भएको थियो ।
