आज विहानै
एक तलाउमा
माछा मरेछ ।
बल्छीलाई कारबाही गरियोस ।
हजुर
माछालाई न्याय दिनुहोस ।
मरेको माछा देखेपछि
मलाई
कंशहरु,रावणहरु
अझै मरेका छैनन भन्ने यकिन भएको छ ।
र यो पनि सिद्ध भएको छ कि
भृकृटी संगै हामीले बुद्धलाई पनि अन्माएछौं ।
धेरैजनाई मेरो उजुरी जाहेरी छ ।
पोखरीलाई, पानीलाई,गडेउलालाई, टागोलाई, बल्छीलाई ।
अनि
कालका देवतालाई धेरै फिराद छ मेरो
तिमी पनि घुषखोरी भएछौ नि
चाकडीमा चुर्लुम्म डुबेछौं नि ।
हिजो त्यो बल्छी
दिन दहाडै
अदालतमा थियो ।
साझँ पख
पार्टी कार्यालयमा थियो ।
मध्य रातमा
मधुशालामा थियो ।
हो बल्छीले माछा खादैन
तर माछा मार्छ
आज
अहिले त्यो बल्छी
अर्को माछा संग छ
त्यसैले डर छ
माछाले नै बल्छी खेलाएपछि ।
खबरदार
माछाहरु
अब बल्छी भन्दा पनि
माछाहरु नै घातक हुनेछन ।
त्यसैले
महोदय,
माछालाई न्याय दिनुहोस ।
बल्छीका मतियारहरु
आफै भ्यागुत्ता कहलिने छन ।
