काठमाडौं । तिहारमा सयपत्री र मखमली मालाले बजार सुसज्जित भएको छ । काठमाडौं उपत्यकामा मालाको माग र खपत धेरै हुँदा तिहारलक्षित माला तथा फूल धमाधम बाहिरि जिल्लाबाट पनि भित्रिरहेको छ ।
लक्ष्मीपूजा गर्न, घर सजाउन र भाइटीकाका लागि मालाको प्रयोग धेरै हुने गर्छ । आज लक्ष्मीपूजा परेकाले सडक पेटीदेखि डिपार्टमेन्ट स्टोरसम्म माला राखिएका छन् । फूल र माला किन्न बिहानैदेखि मानिसहरुको चहलपहल देखिन्छ ।
किसानले उपत्यकाका मुख्य मुख्य बजारमा विभिन्न जिल्लामा उत्पादन गरेका फूलमाला ल्याएर बेच्न थालेका हुन् ।
यो वर्ष मालाको मूल्य गत वर्षकै हाराहारीमा रहेको छ । बजारमा सयपत्री माला एक सयदेखि १५० रुपियाँ र मखमली मालाको मूल्य ५० देखि ६० रुपियाँमा बिक्री हुने गरेको छ । यपपालि तिहारमा सयपत्री माला ४० लाख, चार लाख ७५ हजार मखमली र बाँकी गोदावरी मालाको खपत हुने अनुमान छ ।
तिहारमा सबैभन्दा धेरै सयपत्री मालाको खपत हुने गर्छ । वार्षिक रूपमा फूलको माग १० देखि १५ प्रतिशतले बढ्दै गए पनि स्वदेशी उत्पादनमा आत्मनिर्भर भएकाले आयात गर्नुपर्ने अवस्था छैन । सरकारले गत वर्षदेखि फूलको आयातमा प्रतिबन्ध लगाएकाले फूलको आयात भएको छैन ।
काठमाडौँ, ललितपुर, भक्तपुर, धादिङ, नुवाकोट, सिन्धुली, काभ्रे, रामेछाप, ओखलढुङ्गालगायतका जिल्लाबाट उपत्यकामा फूल तथा माला भित्रिने गरेको छ । फ्लोरिकल्चर एसोसिएसन नेपालका अनुसार मुलुकभर ५२ जिल्लामा २६० हेक्टर क्षेत्रफलमा पुष्प व्यवसाय भइरहेको छ ।
