काठमाडौं । संसदीय छानविन समितिको निर्देशन अनुसार कारवाही प्रक्रिया अघि बढाउँदा प्रश्न उठाउनु राम्रो नभएको सत्तापक्षको भनाई छ ।
बुधबार बिहान बालुवाटारमा बसेको सत्तापक्षको बैठकले संसदीय छानबिन समितिमा भएका दलहरुले रास्वपा सभापति रवि लामिछाने पक्राउको विरोध गर्नु नैतिक अधिकार नहुने निष्कर्ष निकालेको छ ।
बैठकपछि बोल्दै एमाले महासचिव शंकर पोखरेलले लामिछाने पक्राउ प्रकरणको विषयलाई लिएरफौजदारी अभियोगको छानविन भइरहदा सडकबाट अदालतलाई धम्क्याउने कुरा स्वीकार्य नहुने बताए। ‘छानविन र न्यायिक निरुपणको आफ्नो प्रक्रिया हुन्छ। छानविन प्रक्रिया अघि बढिरहेको बेलामा सडकमा भिड जम्मा गरेर छानविन र अदालतलाई समेत प्रभावित पार्नेखालको गतिविधि स्वीकार्य हुँदैन। फौजदारी अभियोगमा छानविन चलिरहेको बेलामा सडकबाट छानविनको प्रक्रियालाई प्रभावित गर्ने कुरा उचित होइन’, उनले भने ।
सत्ता पक्षको कुनै आग्रह नभएको भन्दै उनले छानबिनको प्रक्रिया निश्पक्ष र पारदर्शी रुपमा अगाडि बढ्ने बताए । र, संसदले नै छानविन गर्न निर्देशन दिएकाले त्यो प्रक्रियालाई सहज रुपमा लिनुपर्ने उनको भनाइ छ।
