काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले केही विभाग प्रमुखहरूको जिम्मेवारी हेरफेर गरेकोमा डा. प्रकाशचन्द्र लोहनीले आपत्ति जनाएका छन् ।
अध्यक्ष लिङ्देनले संगठन विभागको प्रमुखमा वरिष्ठ नेता उपाध्यक्ष बुद्धिमान तामाङ्ग, स्थानीय तह परिचालन विभागको प्रमुखमा वरिष्ठ नेता उपाध्यक्ष ध्रुवबहादुर प्रधान, राजनीतिक विभागको प्रमुखमा वरिष्ठ उपाध्यक्ष रवीन्द्र मिश्र र पर्यटन विभागको प्रमुखमा सहायक महामन्त्री विजय खड्कालाई चयन गरेका छन् ।
यसअघि संगठन विभागको प्रमुख धवलशमशेर जबरा थिए । उनी बिरामी भएर विदेशमा उपचार गराउँदै आएका छन् । डा. लोहनीले अध्यक्ष लिङ्देनको निर्णयले बिरामीलाई तनाव दिने काम मात्र भएको भन्दै आपत्ति जनाएका हुन् ।
उनले सामाजिक सञ्जालमा लेखेका छन्– ‘राप्रपाका सांसद तथा महामन्त्री धवलशमशेर बिरामी भएर बिदेशमा उपचार गराउँदै हुनुहुन्छ यस्तो बेलामा उहाँलाई संगठन विभागको प्रमुखबाट हटाउनु अविवेकी तथा अमानवीय निर्णय हो र बिरामी साथीलाई तनाव दिने काम मात्र हो । यो निर्णयप्रति म दुख व्यक्त गर्दछु र मेरो असहमति स्पस्ट गर्दछु ।’
यसैगरी राप्रपा अध्यक्ष लिङ्देनले विपद् व्यवस्थापन विभागको प्रमुखमा केन्द्रीय सदस्य उद्धव थापा, सूचना प्रविधि विभाग(आईटी) प्रमुखमा केन्द्रीय सदस्य उद्धवराज भेटुवाल र लेखा समितिको प्रमुखमा केन्द्रीय सदस्य केदार न्यौपानेलाई तोक्नुभएको छ ।
