काठमाडौँ । नेपाली काँग्रेसका सहमहामन्त्री डा.प्रकाशशरण महतले यो सरकार भ्रष्टचारमा लिप्त छ भन्ने कुरा त सत्तारुढ नेकपाकै अध्यक्ष प्रचण्डको पत्रबाट स्पष्ट भएको छ भन्नुभएको छ ।
नेपाली काँग्रेसको कोरोना अनुगमन समितिद्धारा आज नेपालगन्जमा आयोजना गरिएको अन्तरक्रिया कार्यक्रममा उहाँले भन्नुभयो– यो सरकार भ्रष्टहरुको झुण्ड हो भन्ने कुरा नेपाली काँग्रेसले पहिलेदेखि नै भन्दै आएको हो, आज प्रचण्डको पत्रले त्यसमा थप पुष्टि गरेको छ ।
डा.महतले भन्नुभयो– तपाईहरुलाई थाहै छ वर्तमान सत्तारुढ नेकपाका दुई जना अध्यक्ष छन् र एकजना अध्यक्ष प्रचण्ड हुनुहुन्छ, उहाँले प्रधानमन्त्री तथा सोही दलका अर्का अध्यक्षलाई लेखेको पत्रमा नै यो सरकारका भ्रष्ट क्रियाकलापले जनतामा सरकार र पार्टी दुवैको छवि विग्रिएको स्पष्ट रुपमा भन्नुभएको छ ।
सो कार्यक्रममा डा.महतले वर्तमान सरकारले नेपालमा अनावश्यक विदेशी हस्तक्षेप भित्र्याएको आरोप पनि लगाउनुभयो । उहाँले भन्नुभयो– यो सरकारलाई आफैप्रति तथा जनताप्रति पनि कुनै विश्वास छैन बरु विदेशीहरु आएर तिमीहरु मिल भन्दा मिल्छ । उहाँको संकेत हालैमात्र नेकपामा भएको विवादमा चिनियाँ राजदूतले प्रधानमन्त्री लगायतलाई गरेको भेटप्रति लक्षित थियो ।
उहाँले भन्नुभयो, त्यसैले जुन सरकारले हाम्रो शक्तिको स्रोत विदेश हो भन्ने ठान्दछ, त्यो पार्टी देश र जनताको पक्षमा छैन, नेपाली जनताले आफ्नो सरकारका रुपमा लिन पनि सकेका छैनन् ।
राष्ट्रवादको नाममा नारा दिएर सत्तामा आए पनि यो सरकारको व्यवहार उल्टो छ, त्यसैले सरकारको यो खोक्रो राष्ट्रवाद हो ।
डा.महतले नेकपा नेपाली जनताका तथा किसानका समस्याहरुमा संवेदनशील नरहेको बताउनुभयो । उहाँले भन्नुभयो– मलखाद किन्दा कमिसन हेरेर बस्ने, कमिसन आउँछ कि आउँदैन भनेर कुर्ने र किसानका लागि समयमा नल्याउने यो सरकार किसानका समस्याप्रति कहिल्यै संवेदनशील हुदैन ।
