काठमाडौं । प्रधानन्यायाधीशको सिफारिस गर्न संवैधानिक परिषद्को बैठक आज बस्दै छ । २८ भदौको बैठक कुनै निर्णय नगरी सकिएपछि आज पुन: बैठक बस्न लागेको हो ।
आज संवैधानिक परिषद्को बैठक साँझ ५ बजे बस्ने प्रधानमन्त्री केपी शर्मा ओलीको सचिवालयले जनाएको छ ।
प्रधानन्यायाधीश विश्वम्भरप्रसाद श्रेष्ठले असोज २० गतेदेखि अवकाश पाउँदै हुनुहुन्छ । त्यसअघि नै नयाँ प्रधानन्यायाधीश नियुक्ति गर्नुपर्छ ।
न्याय परिषद्ले प्रधानन्यायाधीश बन्न योग्य भएका सर्वोच्च अदालतका ८ जना न्यायाधीशको नाम संवैधानिक परिषद्मा पठाएको छ । ती नाममध्ये एक जनालाई सिफारिस गर्नुपर्ने छ ।
तर अहिलेसम्म सर्वोच्चमा वरिष्ठतम् न्यायाधीशलाई नै प्रधानन्यायाधीश बनाउने प्रचलन छ । यस पटक पनि वरिष्ठतम् न्यायाधीश प्रकाशमान सिंह राउतको सिफारिस गर्ने तयारी छ ।
