काठमाडौँ । चोटका कारण दुई महिना मैदानबाट बाहिर रहेका अर्जेन्टिनी कप्तान लियोनल मेसीले मेजर लिग सकर (एमएलएस)मा सानदार पुनरागमन गरेका छन् ।
आइतबार दुई महिनापछि मैदान उत्रिएका मेसीले इन्टर मियामीलाई जित दिलाउन दुई गोल हाने ।
मेसीप्रेरित मियामीले लिगमा फिलाडेल्फियाविरुद्ध ३–१ को पुनरागमन जित निकाल्यो ।
खेलको दोस्रो मिनेटमा मिकाएल उहरेले गोल गर्दै पाहुना टिम फिलाडेल्फियालाई अग्रतामा राखेका थिए । तर, मेसीले २६औँ मिनेटमा पहिलो तथा त्यसको चार मिनेटपछि नै दोस्रो गोल गर्दै मियामीलाई २–१ गोलले अघि बढाए ।
यस्तै, इन्जुरी समयमा लुइस स्वारेजले गोल गरेपछि मियामीले ३–१ को जित पक्का गरेको हो ।
जितसँगै शीर्ष स्थानमा रहेको मियामीले १० अंकको अग्रता बनाएको छ । मियामीको २८ खेलबाट ६२ अंक छ । समान खेलबाट ५२ अंक जोडेको सिनसिनाटी तालिकाको दोस्रो स्थानमा छ ।
२८ खेलबाट ३० अंक जोडेको फिलाडेल्फिया भने तालिकाको ११औँ स्थानमा छ ।
