काठमाडौं । नेपाली कांग्रेसका उपसभापति तथा सांसद धनराज गुरुङमाथि सहकारीको रकम दुरुपयोग गरेको आरोप लागेको छ । गुरुङले सहकारीको रकम हिनामिना गरेको भन्दै छानबिन गर्न नेपाल प्रहरीको केन्द्रीय अनुसन्धान ब्यूरोमा उजुरी परेको छ । योसँगै संसद्मा समेत प्रश्न उठेको छ ।
धनराजकी श्रीमती ज्योति गुरुङ ललितपुरको मितेरी सहकारीको महाप्रबन्धक रहेका बेला रकम हिनामिना गरेको आरोपमा सीआईबी उजुरी परेको हो । ज्योतिले १४ करोड ८१ लाख रकम दुरुपयोग गरेको र त्यसमा धनराजको पनि संलग्नता रहेको भनी उक्त रकम उठाउने वातावरण बनाइदिन सहकारीका अध्यक्ष कुम्भराज गुरुङले प्रहरीमा उजुरी दिएका हुन् ।
ज्योतिलाई पक्राउ गर्न रेडकर्नर नोटिस जारी गरी नेपाल ल्याएर उनको सम्पत्ति बेचेर भए पनि सहकारीका बचतकर्ताको रकम फिर्ता गर्ने वातावरणको माग उजुरीमा गरिएको छ ।
धनराज र ज्योति मिलेर रकम हिनामिना भएको चाल पाएपछि सहकारीका बोर्ड सदस्य मिलेर दुवैसँग छलफल गरी कागज गराएको प्रमाण सहकारीसँग रहेको दाबी अध्यक्ष कुम्भराजले गरेका छन् ।
गुरुङमाथि सत्ताको आडमा अनुसन्धान नभएको भन्दै संसद्मा पनि प्रश्न उठेको छ । सोमबार संसद्को बैठकमा रास्वपा सांसद गणेश पराजुलीले गुरुङमाथि छानबिन हुन्छ कि हुन्न भनेर प्रश्न गरेका छन् ।
सहकारी संस्था बचत रकम संसदीय छानबिन विशेष समितिमा पनि मितेरीका अध्यक्ष गुरुङले बयान दिएका थिए । बयानका क्रममा पनि उनले सहकारी बचत अपचलनको सबै विषय राखिएका थिए ।
सहकारीको रकम अपचलनको आरोप लागेपछि कांग्रेसका उपसभापतिसमेत रहेका सांसद गुरुङले भने त्यसको खण्डन गरेका छन् । उनले विज्ञप्ति जारी गर्दै श्रीमतीले लिएको ऋणको विषयमा आफूलाई जानकारी नभएको र उनीसँग २०७६ फागुनमा ललितपुर जिल्ला अदालतमा सम्बन्धविच्छेद गरेको उनले स्पष्ट पारेका छन् ।
