काठमाडौँ । जय शाह अन्तर्राष्ट्रिय क्रिकेट काउन्सिल (आईसीसी)को अध्यक्षमा निर्वाचित भएका छन् । यो पदका लागि शाहविरुद्ध कसैले निवेदन नदिएपछि ३५ वर्षीय शाह निर्विरोध चयन भएका हुन् ।
उनले वर्तमान अध्यक्ष ग्रेग बार्कलेको ठाउँमा डिसेम्बर १ मा अध्यक्षको पदभार ग्रहण गर्नेछन् । उनी हाल भारतीय क्रिकेट कन्ट्रोल बोर्ड (बीसीसीआई) का सचिव छन् ।
निर्वाचित भएपछि शाहले भने, ‘मलाई आईसीसीको अध्यक्षमा निर्वाचित गर्नु भएकोमा सबैलाई धन्यवाद । म क्रिकेटलाई विश्वव्यापी रूपमा विकास गर्न काम गरिरहनेछु । वर्तमानमा क्रिकेटका धेरै ढाँचाहरूलाई प्रवर्द्धन गर्नु महत्त्वपूर्ण छ । म खेलमा नयाँ प्रविधि ल्याउने प्रयास गर्नेछु, साथै म विश्वकप जस्ता कार्यक्रमलाई विश्व बजारमा लैजानेछु ।’
योसँगै बीसीसीआईले अब सचिव पदमा नयाँ नियुक्ति गर्नुपर्नेछ । अरुण जेटलीका छोरा तथा दिल्ली क्रिकेट संघ (डीडीसीए) का अध्यक्ष रोहन जेटली बीसीसीआईको नयाँ सचिव बन्न सक्ने बताइन्छ ।
न्यूजिल्याण्डका वर्तमान आईसीसी अध्यक्ष ग्रेग बार्कलेको कार्यकाल नोभेम्बर ३० मा सकिँदैछ । आईसीसीले अगस्ट २० मा बार्कले लगातार तेस्रो पटक अध्यक्ष बन्न नसक्ने बताएको थियो । उनी २०२० देखि यो पदमा थिए । उनले नोभेम्बरमा आफ्नो पद छोड्नेछन् ।
