एजेन्सी । तेलुगु स्टार नागार्जुनको हैदराबादमा रहेको गैरकानुनी एन कन्भेन्सन सेन्टरमा डोजर चलेको छ ।
शनिबार उक्त स्थान बुलडोजरले ध्वस्त पारेको हो । उनले रंगारेड्डी जिल्लाको शिल्परामम नजिकै माधपुरको हाइटेक सिटी नजिक यो केन्द्र बनाएका थिए ।
तालको जग्गामा गैरकानुनी रूपमा यो केन्द्र निर्माण गरेको आरोप अभिनेतामाथि लागेको थियो । अर्कोतर्फ, नागार्जुनले यो कार्यप्रति असन्तुष्टि व्यक्त गरेका छन् । उनले भने, ‘अदालतले तोड्ने निर्णय गरेको भए म आफैं तोड्ने थिएँ । अधिकारीहरुको यो गलत कारबाहीमा अदालतबाट राहत मिल्ने विश्वास लिएको छु ।’
सम्मेलन केन्द्र ६ दशमलव ६९ एकडमा निर्माण गरिएको हो । थुम्मीकुण्टा तालको ३.३० देखि ३.४० एकड जमिन अतिक्रमण गरी निर्माण गरिएको हो । हैदरावादका भास्कर रेड्डीलगायत धेरै उजुरीकर्ताहरूले हाइड्रामा गुनासो गरेका थिए । यसपछि यो कारबाही गरिएको हो ।
६४ वर्षीय नागार्जुनले १०० भन्दा बढी हिन्दी र साउथ फिल्ममा काम गरिसकेका छन् । उनको पहिलो फिल्म विक्रम (१९८६) थियो । यस्तै, उनले फिल्म शिवबाट बलिउडमा आफ्नो यात्रा सुरु गरेका थिए ।
