काठमाडौ । सत्तारुढदल नेपाल कम्युनिष्ट पार्टीको स्थायी समितिको बैठक पार्टी कार्यलय धुम्बाराहीमा दिउसो १ बजे बस्दैछ । केही समयदेखि शीर्षनेताहरु बीच बढ्दै गएको अन्तरकलह लिखित रुपमा नै आरोप प्रत्यारोपमा उत्रिएपछि शीर्ष बिवाद सचिवालय हुदै स्थायी समितिसमक्ष पुग्न लागेको हो । पार्टी अध्यक्ष तथा प्रधानमन्त्री केपी शर्मा ओली एजेण्डा तय गरेर स्थायी समितिको बैठक बोलाउनुपर्ने पक्षमा रहे पनि अधिकांश सचिवालयका सदस्यहरु अब यी बिषयहरु सचिवालयबाट टुङ्गोमा पुग्न नकसेको कारण स्थायी समितिको बैठकबाट नै निरुपण गर्ने निर्णयमा पुगेका हुन् ।
लामो समयदेखिको मौनतालाई तोड्दै सनिबारको सचिवालयको बैठक अघि अध्यक्ष केपी ओली र पुष्पकमल दाहालबीच भएको सम्बादले केही मात्रमा “आईसब्रेक ” भएको स्रोतले जनाएको छ । श्रोतका अनुसार स्थायी समितिका अधिकांश सदस्यहरु पार्टी एकताको पक्षमा रहेका कारण दुबै अध्यक्षको प्रतिबेदनहरु स्थायी समितिको बैठकमा पेश हुने र ती प्रतिबेदनलाई एकीकृत गर्न कार्यदल गठन हुने सम्भाबना रहेको छ ।
शनिबारको बैठकमा गृहमन्त्री समेत रहनुभएका सचिवालय सदस्य रामबहादुर थापाले पनि सोही अनुसारको प्रस्ताब राखेपनि स्थायी समितिले त्यसलाई अघि बढाउने सम्भाबना रहेको स्रोतले जनाएको छ । सम्भवत सचिवालयका सदस्य बामदेब गौतमसहित अधिकांश स्थायी समिति सदस्यहरु रहेको कार्यदल गठन हुनसक्ने छ ।
कार्यदलले काम गरिरहँदा पनि त्यस बीचमा शीर्षनेताहरुबीच सम्बादलाई निरन्तरता दिने र हालसम्म देखिएका असहमतिलाई साँघुरो बनाउने प्रयास हुनेछ । एक अर्काप्रति निकै आक्रामक हुनुभएका अध्यक्ष ओली र दाहालबीच सम्बाद सूरु भएका कारण अर्का बरिष्ठ नेता माधब नेपाल केही सशंकित हुनुभएका कारण केही समस्या उत्पन्न भएको एक सचिवालय सदस्यले जानकारी दिनुभयो ।
