काठमाडौं । नेपाली सेनाको राष्ट्रिय सेवा दलले सिनियर डिभिजन राष्ट्रिय सेवा दल तालिम सञ्चालन गरेको छ ।
देशभरका २१ वटा जिल्लामा रहेका ४५ वटा बिद्यालयहरुमा अध्ययनरत छात्र–छात्राहरु १६ सय २० जनालाई तालिम दिइएको हो ।
दुई चरणमा सञ्चालन हुने तालिम अन्तरगत पहिलो चरणमा संस्थागत तालिम र दोस्रो चरणमा वार्षिक सामूहिक क्याम्प सञ्चालन हुनेछ ।
आर्थिक वर्ष २०८१/८२ मा देशभरका ७७ जिल्लामध्ये ७५ वटा जिल्लामा रहेका २१४ वटा बिद्यालयहरुमा अध्ययनरत ७ हजार ७ सय ४ जना छात्र छात्राहरुलाई तालिम (जुनियर तथा सिनियर डिभिजन) गराउने योजना अनुरुप २०८१ आषाढ १४ गतेबाट १६९ वटा बिद्यालयमा अध्ययनरत ६ हजार ८४ जना छात्र छात्राहरु समावेश गरी जुनियर डिभिजन तालिम सञ्चालन भइरहेको छ ।
तालिमहरुमा सैनिक कला, विपद् जोखिम न्यूनीकरण, नेतृत्व तथा व्यक्तित्व विकास, सामाजिक उत्तरदायित्व, अनुशासन लगायत विविध विषयमा सैद्धान्तिक तथा व्यवहारिक ज्ञान प्रदान गरिन्छ ।
२०२२ सालमा स्थापना भएको राष्ट्रिय सेवा दलले आफ्नो स्थापनाकालदेखि हालसम्म ७४ हजार ४ सय ८० जनालाई सिनियर तथा जुनियर डिभिजन राष्ट्रिय सेवा दल तालिम प्रदान गरी सकेको जनाएको छ ।
