काठमाडौँ । भुटानी शरणार्थी प्रकरणमा पक्राउ परेका बेचन झाले इन्कारी बयान दिएका छन् ।
असार १४ मा पक्राउ परेका बेचनले अनुसन्धान अधिकृतहरूसँगको बयानमा भुटानी शरणार्थीको सम्बन्धमा आफूलाई कुनै जानकारी नभएको बताएका हुन् ।
बेचनले मन्त्रिपरिषद्बाट भुटानी शरणार्थीको फाइलबारे ‘निर्णय गराउँछु’ भनेर २ करोडको चेक लिएको अन्य प्रतिवादीहरूको दाबी छ । तर,उनले आफू कुनै दलमा आबद्ध नरहेको जिकिर गरेका छन् ।
काठमाडौंका अनुसन्धान अधिकृतहरुले उनको बयानबारे सत्यता परीक्षण गर्न पोलिग्राफ जाँच गराउन भनेपनि झाले पोलिग्राफ जाँच गराउन नमानेको खुलेको छ । अनुसन्धान अधिकृतहरूले जिल्ला सरकारी वकिल कार्यालय काठमाडौँमा बुझाएको प्रतिवेदनमा उनले पोलिग्राफ परीक्षण गर्न नमानेको व्यहोराको प्रतिवेदन पनि समावेश गरिएको छ ।
सरकारी वकिलको रोहबरमा अनुसन्धान अधिकृतहरुले झा र अर्का आरोपी रामशरण केसीबीच भएको संवादको एउटा अडियो पनि उनलाई सुनाएका थिए । तर उनले उक्त आवाज आफ्नो नभएको उनले जिकिर गरेका छन् ।
उनले बयानमा भनेका छन्, ‘भुटानी शरणार्थी सम्बन्धमा मलाई जानकारी छैन । म कुनै राजनैतिक पार्टीमा आबद्ध व्यक्ति होइन । टेकनारायण पाण्डेसँग मेरो चिनजान सम्पर्क समेत नभएकोले निजले कहाँ के कस्तो बयान दिएका हुने उनै जानुन् । चेकको सम्बन्धमा मलाई केही जानकारी छैन ।’, उनले थपे,’अडियोहरुमा भएको संवाद मेरो होइन । भिडियोमा देखिएका व्यक्तिहरू को हुन मलाई थाहा भएन । म मेरो आवाज परीक्षण गर्न म मन्जुर छु । श्याम कुमार श्रेष्ठलाई चिन्दिन । निजले के बयान दिए मलाई सरोकार छैन । हरिभक्त महर्जनलाई म चिन्दिन मैले निजबाट कुनै पनि रकम लिएको छैन । उनले के बयान दिएका छन्, उनै जानुन् ।’
