काठमाडौं । ब्राजिलको साओ पाउलोमा भएको विमान दुर्घटनामा ६१ जनाको मृत्यु भएको छ । विमान रहेका ५७ यात्रु र ४ चालक दलका सदस्य सबैको मृत्यु भएको अन्तर्राष्ट्रिय समाचार संस्थाहरूले जनाएका छन् ।
ब्राजिलको दक्षिणी राज्य परानाको कास्काभेलबाट साओ पाउलो सहरका लागि उडेको भोएपास एयरलाइन्सको ट्विन इन्जिन टर्बोप्रप विमान भिन्हेडो सहरमा खसेको हो ।
स्थानीय अधिकारीलाई उद्धृत गर्दै बीबीसीले जनाएअनुसार दुर्घटनामा कुनै यात्रुलाई जीवित उद्धार गर्न सकिएन । आवासीय भवनको कम्पाउन्डमा जहाज खसेको तर थप मानवीय क्षति नभएको बताइएको छ ।
सामाजिक सञ्जालमा भाइरल बनिरहेको उक्त विमान दुर्घटनाको भिडियोअनुसार जहाज एक चक्कर लगाएर धुँवाको मुस्लो उडाउँदै दुर्घटना भएको छ ।
ब्राजिलका राष्ट्रपति लुला दा सिल्भाले यस दु:खद घटनाप्रति दु:ख व्यक्त गर्दै पीडितका परिवारप्रति समवेदना प्रकट गरेका छन् । विमान दुर्घटना के कारणले भएको हो खुलेको छैन ।
