नेपाली काँग्रेसको १४ औँ महाधिवेशनप्रति आम चासो र चिन्ता व्याप्त छ । हाल जुन किसिमले क्रियाशील सदस्यता फारम वितरण भइरहेको छ त्यसले पार्टी पद्दतीप्रति प्रश्नै प्रश्न उब्जाएको छ । काठमाडौँ महानगरपालिका वडा नं ३२ जहाँ वाट ठुलो सङ्ख्या (करिब १००) मा क्षेत्रीय प्रतिनिधि निर्वाचित हुन्छन् त्यो ठाउँमा सदस्यता फारम केही व्यक्तिहरूले कब्जामा लिएका छन् । यसले गर्दा एकातिर शीर्ष नेताहरूको बदनाम भइरहेको छ भने अर्कोतिर कार्यकर्ता निष्क्रिय र पलायन हुने स्थितिमा छन् । वडा इकाई सभापतिले काँग्रेसप्रति जीवनभर समर्पित तथा निष्ठा र इमानमा बसेका कार्यकर्ताको पहुँचमा सहजै नपुग्ने गरी आर्थिक तथा अन्य स्वार्थ जोडिएका समूहलाई १५० र २०० का दरले फारम वितरण गरेको भनी यस वडामा सक्रिय विभिन्न कार्यकर्ताहरूले सामाजिक सञ्जालमा असन्तुष्टि पोखेका छन् ।
काँग्रेस विधान विपरीत बुथ कमिटी र इकाई कार्यसमितिलाई छायामा राखेर ८ सय फारमको चरम दुरुपयोग गरिएको छ । कतिसम्म भने नयाँ फारम आएको दिनदेखि पार्टी वडा कार्यालय बन्द छ । मनोहरा र वाग्मतीको किनारमा रहेका चिया पसल र बन्द कोठावाट फारम वितरण भइरहेको छ । यो कुकार्यमा सभापति शेरबहादुर देउवा र नेता प्रकाशमान सिंहको नाम जोड्दै बदनाम गरिएको छ । यो क्रियाशील खरिद बिक्री प्रकरणमा न सभापति देउवाको चासो र समर्थन छ, न नेता प्रकाशमान सिंहको नै । उनीहरूलाई बदनाम गर्दै र कार्यकर्ताको माझ अलोकप्रिय बनाउँदै क्रियाशील फारम खरिद बिक्री गर्ने समूह छ । बरु नेता प्रकाशमान र सभापति शेरबहादुर देउवाको विरुद राष्ट्रियस्तरमा नै आवाज उठाउने केही युवा नेताको समेत यसमा संलग्नता देखिन्छ ।
पूर्णकालीन रूपले राजनीतिमा सक्रिय रहँदा मैले यहाँ राजनीतिक विकृतिको डरलाग्दो रूप देखेको छु । नेता कृष्ण प्रसाद भट्टराईको अनुयायीका रूपमा निष्ठा र इमानको राजनीतिका निम्ति म मैदानमा उभिएको हुँ । मैले आफ्नो राजनीतिक विरासत र भावी कार्ययोजना अनुरूप आफ्नो धरातल आफै निर्माण गरेको छु । कसैको वैशाखी टेकेर उभिएको छैन ।
क्रियाशील सदस्यता वितरणमा देखिएको भयावह विकृतिको बिरूद्द नबोल्दा आफुपनि त्यसकै समर्थक होकि जस्तो देखिने र म प्रति विश्वास गर्ने कार्यकर्ताको भावनामा चोट पर्ने भएकाले मैले यसलाई सार्वजनिक रूपमा अभिव्यक्त गरेको हुँ । जबसम्म क्रियाशील सदस्यता तल्लो तहका कार्यकर्ताको सहज र स्वतन्त्र पहुँचमा हुँदैन तबसम्म देशले सक्षम र इमान्दार नेता पाउन सक्दैन ।
