काठमाडौँ । बालुवाटारमा संवैधानिक परिषद्को बैठक शुरु भएको छ । तर सो बैठकमा प्रमुख प्रतिपक्षी दलका नेता शेरबहादुर देउवा उपस्थित भएपनि सभामुख अग्निप्रसाद सापकोटा भने अनुपस्थित भएका छन् । प्रमुख विपक्षी दलका नेताको अनुपस्थिति हुने भएपछि स्थगित भएको परिषदको बैठक आजका लागि बोलाइएको थियो । त्यसैबमोजिम बैठक अहिले केही बेरअघि मात्र बालुवाटारमा शुरु भएको हो । तर सो बैठकमा सभामुख सापकोटा भने उपस्थित नहुने भएका छन् ।
बैठक विभिन्न संवैधानिक आयोगमा नियुक्ति सिफारिसका बारेमा छलफलका लागि बस्न लागेको हो । तर आज सभामुख उपस्थित नहुने भएपछि त्यसको वैधानिकता के हुन्छ भन्ने बारेमा भने केही आएको छैन । उता आज सभामुख सापकोटा उक्त बैठकमा किन सहभागी नहुने हुन् भन्ने बारेमा भने केही बताइएको छैन । तर नेकपामा देखिएको विवादका कारण नै उनको अनुपस्थिति हुने अनुमान सर्वत्र गरिएको छ ।
यस विषयमा सभामुखले केही नभने पनि नेकपाका अध्यक्ष प्रचण्डले नै उनलाई सो बैठकमा अनुपस्थित हुन भनेका अनुमान गरिएको छ । एम समाचार स्रोतका अनुसार सोमबार राति नै आफू बैठकमा नआउने जानकारी प्रधानमन्त्री ओलीलाई गराएका थिए । यसअघि पनि दुई दिन अघि राखिएको बैठकमा पनि विपक्षी दलका नेतालाई सो बैठकमा उपस्थित नहुन प्रचण्ड र माधव नेपालले भनेका समाचार आएको थियो । तर त्यसका बाबजुद पनि देउवा भने आज बैठकमा पुगेका छन् ।
अख्तियार दुरुपयोग अनुसन्धान आयोग, मानवअधिकार आयोगलगायत विभिन्न संवैधानिक आयोगमा ४५ सिटमा नियुक्तिका लागि परिषद्को बैठक बस्न लागेको हो । यसअघि आइतबार बोलाइएको बैठकमा पनि सभामुख सापकोटा जानुभएको थिएन। बैठकले बैधता पाउनका लागि अध्यक्षबाहेक ४ जनाको उपस्थिति अनिवार्य मानिन्छ । परिषदमा एकजना सदस्य (उपसभामुख) पद रिक्त छ ।
