काठमाडौँ । ‘अबचाहिँ बाघ संरक्षणका लागि कदम चाल्ने समय आयो’ भन्ने नारासहित आज बाघ दिवस विविध कार्यक्रम आयोजन गरी मनाइँदै छ ।
बर्दिया राष्ट्रिय निकुञ्जमा पाटेबाघको सङ्ख्या एक सय २५को हाराहारीमा पुगेको छ । यो निकुञ्ज पाटेबाघका लागि दोस्रो ठूलो बासस्थान मानिन्छ । चितवन राष्ट्रिय निकुञ्जमा एक सय २८ पाटेबाघ रहेको बताइएको छ ।
यसैबीच आज यहाँ बाघबारे यस्ता रोचक कुराहरुबारे जानकारी लिऔं जुन तपाईलाई थाहा नहुन सक्छ ।
–विश्वका करिब ७० प्रतिशत बाघ भारतमा मात्र पाइन्छ ।
–बाघ संसारमा बिरालोको सबैभन्दा ठूलो प्रजाति हो ।
–पृथ्वीको सबैभन्दा ठूलो मांसाहारी जनावरको सूचीमा बाघ तेस्रो स्थानमा छ भने ध्रुवीय भालु पहिलो स्थानमा र खैरो भालु दोस्रो स्थानमा छ ।
–बाघ जन्मेको एक सातासम्म पूर्णतया दृष्टिविहीन हुन्छन् । जसमध्ये झण्डै आधा बच्चाहरू(डमरु) वयस्क हुनुअघि नै मर्छन् ।
–जन्मेपछि २ वर्षसम्म बच्चाको हेरचाह महिला बाघले मात्र गर्छिन् ।
–हामी मानिसको औंठाछाप जस्तै, प्रत्येक बाघको शरीरमा धारहरू अद्वितीय छन् ।
–बाघको रातमा देख्ने क्षमता मानिसको तुलनामा करिब ६ गुणा बढी हुन्छ ।
–बाघको गर्जनको आवाज धेरै ठूलो हुन्छ । तपाईं यसलाई ३ किलोमिटर टाढाबाट पनि सुन्न सक्नुहुन्छ ।
–बाघको दौडने गति ६० किलोमिटर प्रतिघण्टासम्म हुन सक्छ ।
–बाघहरू करिब ८ मिटरको दुरी र ५ मिटरको उचाइमा उफ्रन सक्छन् ।
–बाघको औसत उमेर १०–१५ वर्ष हुन्छ तर विशेष परिस्थितिमा यो २५ वर्षसम्म बाँच्न सक्छ ।
–बाघलाई छिट्टै भोक लाग्छ र २–३ हप्ता भोकै बसेमा मर्न सक्छ भने सामान्य मानिस ३०–४० दिनसम्म नखाएर बाँच्न सक्छ ।
–भाले बाघ पोथी भन्दा ठूलो हुन्छ । भाले र पोथी बाघ एकसाथ मिल्न सक्छन् । तर, भाले–भाले र पोथी–पोथी बाघ मिल्न सक्दैनन् ।
