काठमाडौं । बुधबार नेप्से परिसूचक ६ दशमलव २० अंक घटेर शेयर बजार २ हजार ५५ दशमलव २२ विन्दुमा बन्द भएको छ । यो दिन सेन्सेटिभ इन्डेक्स शून्य दशमलव ४३ अंक घटेर ३८६ दशमलव ९८ विन्दुमा झरेको छ । मंगलबार बजार ५ दशमलव ७५ अंकले घटेर २ हजार ६१ दशमलव ४१ विन्दुमा बन्द भएको थियो । २ हजार ९७ दशमलव २० विन्दुदेखि खुला भएको बुधबारको बजार २ हजार ४१ दशमलव ८५ विन्दुसम्म झरेको थियो ।
बुधबार नेप्से परिसूचकसँगै मंगलबारको तुलनामा कारोबार रकम पनि घटेको छ । मंगलबार रू. ६ अर्ब ६ करोड ९३ लाख ३१ हजार बराबरको ९७ लाख ५५ हजार ५४७ कित्ता शेयर खरीदविक्री भएको थियो । बुधबार भने रू. ५ अर्ब १४ करोड ४६ लाख ७५ हजार बराबरको १ करोड ५ लाख ५८ हजार ३९१ कित्ता शेयर कारोबार भएको छ । यो कारोबार १९९ ओटा कम्पनीको ४९ हजार १५९ पटकको व्यापारमा भएको हो ।
बुधबार नेपाल लाइफ इन्स्योरेन्सको पनि रू. ३१ करोड ९१ लाख ७६ हजार बराबरको शेयर कारोबार भएको छ । यो साता तीन कारोबार दिन लगातार सर्वाधिक रकमको शेयर कारोबार भएको उक्त कम्पनीलाई बुधबार नेपाल क्रेडिट एण्ड कमर्स बैंकले पछि पारेको हो । बुधबारको बजारमा लघुवित्तको सर्वाधिक २ दशमलव ३४ प्रतिशतले परिसूचक बढेको छ ।
त्यस्तै व्यापारिकको १ दशमलव १८ प्रतिशत, बैंकिङको शून्य दशमलव शून्य ६ प्रतिशत, होटलको शून्य दशमलव ३६ प्रतिशत, विकास बैंकको शून्य दशमलव ४४ प्रतिशत, उत्पादन तथा प्रशोधनको शून्य दशमलव ४३ प्रतिशत र म्युचुअल फण्डको शून्य दशमलव शून्य १ प्रतिशत परिसूचक बढेको छ ।
यस दिन अन्यको १ दशमलव ५१ प्रतिशत, जलविद्युतको १ दशमलव ४३ प्रतिशत, वित्तको शून्य दशमलव २४ प्रतिशत, निर्जीवन बीमाको १ दशमलव ३९ प्रतिशत र जीवन बीमाको १ दशमलव १७ प्रतिशत परिसूचक घटेको छ । सामान्य अंकले घटेको बजारमा छ्याङ्दी हाइड्रो र महुली सामूदायिक लघुवित्तको शेयरमूल्य १० प्रतिशतले बढेको छ ।
त्यस्तै समिट लघुवित्तको ९ दशमलव ९९ प्रतिशत, नारायणी डेभलपमेण्ट बैंकको ९ दशमलव ९८ प्रतिशत आरएमडीसी लघुवित्तको ९ दशमलव ९५ प्रतिशत, माउण्टेन इनर्जी नेपालको र सूर्योदय लघुवित्तको शेयरमूल्य ९ दशमलव ८८ प्रतिशतले बढेको छ । माउण्टेन इनर्जी नेपालको दोस्रो बजारमा बुधवारदेखिनै शेयर कारोबार शुरु भएको हो । पहिलो दिन उक्त कम्पनीको सकारात्मक शुरुवात भएको छ ।
यस दिन सर्वाधिक रकमको कारोबार नेपाल क्रेडिट एण्ड कमर्स बैंकको भएको छ । उक्त कम्पनीको रू. ३९ करोड ४३ लाख ९५ हजार बराबरको शेयर कारोबार भएको हो । सर्वाधिक रकमको कारोबार भएको उक्त कम्पनीको शेयरमूल्य पनि ८ दशमलव ३३ प्रतिशतले बढेर अन्तिम मूल्य रू. ३२५ कायम भएको छ । यो दिन नेपाल क्रेडिट एण्ड कमर्स बैंकको शेयर न्यूनतम रू. २९९ देखि अधिकतम रू. ३३० सम्म खरिद विक्री भएको छ ।
बुधबारको बजारबाट एनएमबि–५० का इकाईधनीहरुले सर्वाधिक गुमाएका छन् । यो दिन एनएमबि–५० को इकाईमूल्य ४ दशमलव ४८ प्रतिशतले घटेको हो । योसँगै शिखर इन्स्योरेन्सको ३ दशमलव ३३ प्रतिशत, गुडवील फाइनान्सको ३ दशमलव २६ प्रतिशत र रिडी हाइड्रोपावरको शेयरमूल्य ३ दशमलव २१ प्रतिशतले घटेको छ ।
